投票主題
[歐美] 保衛奇俠 (Watchmen)評分
我今日先去睇《保衛奇俠 (Watchmen)》,事實我入場前都係當佢係一套經典英雄片,
一正一邪打到死再加特技、電腦、視覺效果果D。所以特別去左I-MAX睇~~ 但睇完,發覺完全係兩件事,講心理多過打,如果以一套經典英雄片去睇事實上唔好睇,仲好差~~~ 但事實上,我都覺得WATCHMEN係一套好有深度既戲,而且不合適只想睇電影作娛樂或輕鬆一下的人~~~ 好既方面: 1.) 刻意講英雄既黑暗面,而且做事方式如罪犯,每個人都有正邪既時候 e.g. 如笑面俠強姦同伴英雄,開槍打一D抗議市民 2.) 英雄既軟弱及無能,不可隨心所想 e.g 用床上戲去刻劃無能,好似博士咁分身都不能滿足女伴,阿DAN 受唔到引誘,未開始而完事^^笑面俠覺得自己無朋友,走去自己最大既敵人哭訴。 3.) 童年既事足以影響一生 e.g. 墨譜怪傑 OR Laurie 4.) 人生總要選擇及有時需要犧牲才成大事 e.g. 博士因工作不能抽空,珍惜身邊人;Ozymandias為成就計劃而犧牲佢隻「寵物」;博士背負全球人民指責,離開地球,好讓一個謊言令兩大強國好友對外。 P.S 太多道理不能盡寫 壞既方面: 1.) 太貪心,想透過電影講太多野,娛樂性不大,而且過於說理,但因同時說理太多,明既都不能即時消化晒 2.) 市場推廣好有問題,預告片似經典英雄片多,入場後完全兩件事 3.) 以太多時間去講笑面俠,其他角色講得唔多,好似可有可無,只係出場幫助導演刻劃人性既不同 欣賞之處: 用好多配樂去親托英雄背景 用一套電影去令人反思多種問題及人性 總結: 我覺得佢似《黑夜之神》、《罪惡城》既混合版,而且比《黑夜之神》更暗、《罪惡城》更暴力及色情,而且仲要涉及宗教, 令電影好複雜,故事及娛樂性不足,但刻劃人性係要稱讚一下: 笑面俠:自私、主觀、重情慾、享受一時既快感 曼克頓博士:冷漠、有大智慧卻小愚蠢、聰明人或當權者中既傀儡 DAN:軟弱、怕事、逃避 墨譜怪傑:自卑、孤癖、不善社交、黑白太過分明,用面具逃避及蓋掩童年陰影 Laurie:逃避往時,不體諒他人,放任 Ozymandias:自大、為達目的不擇手段 即使有部份角色描述不多,仍然易見;事實《保衛奇俠 (Watchmen)》係暫時不合香港市場, 因為大部份人都係想娛樂多過思考,工作已經忙碌,看電影仲要思考,唔好玩LA! 好似《斷背上》我同朋友去睇,4個人得我一個無訓過,而且感受都電影帶出既不理念。 《黑夜之神》好好多,同一班人去睇再多2個人,5個都說好,人性兩面,好多人都睇得到, 而且主要想講既都知道,但仍然有一個講「都唔係好好姐,都似蜘蛛俠咁既!」 《保衛奇俠 (Watchmen)》不能好似《黑夜之神》係因為後者在中心思想同娛樂性取到平衡, 而前者只說道理少了娛樂性,令電影不能成功滲入市場,再多道理都只有少部份人可明白。 原本俾5分,但配樂同刻劃人性要加番佢分,俾7分佢la 大家都留下意見啦,以上都係我既睇法,不過,希望大家唔好抨擊其他人 大家都係戲迷,尊重大家對電影既睇法,大家鍾意咁既戲種都唔一樣ma??^^ ps10分最高呀 |
|
|