標題:
`當我們學會愛之後♥♥{轉}
[打印本頁]
作者:
tellme
時間:
2008-11-16 17:56
標題:
`當我們學會愛之後♥♥{轉}
第一章 - 第一節 - part 1
「喂,死野行快d啦!」
「得啦得啦!」
我叫阿ka,頭先係度吹三吹四個個係阿奈。佢就住係我屋企隔離,我同佢由細玩到大架,絕對係名副其實既好姊妹。
基上我地一日裡面發生d乜都會同對方講,尤其係有仔昅個陣。梗係啦,我同佢最大既嗜好就係昅仔喎,有正野個陣點可以唔講比大家知?我最鍾意昅靚仔,靚得黎有返些少男人味個隻就正晒。而佢呢,就鍾意型仔,有咁型得咁型就得架啦,基本上唔需要理會個樣係點。
大家Taste唔同,so我同佢都可以好肯定咁講句,呢世人肯定唔會鍾意埋同一條仔,梗加唔會有爭仔既情況出現。
「o靚仔,得未呀你?」講緊野呢個叫阿鋒,出晒名靚仔,d女多到不得了。女多還女多,但無一個係佢鍾意既,逢三日就換一次畫,條條女過唔到3day就拜拜。
「等陣駛死咩!都要我整好個頭先行得架!」整緊頭呢個叫阿sam,雖然個樣就唔靚仔架啦,不過勝在夠型,仲要係超級咁型個隻!所以就算佢唔靚仔,d女一樣唔少得過阿鋒。佢最鍾意就係去蒲去玩兼媾女,換女既速度仲快過阿鋒。
跟住仲有個阿龍,佢個樣…靚仔加型仔囉。不過講靚仔唔夠阿鋒黎,講型又未夠阿sam型,十足十阿鋒同阿sam既結晶品。
「阿鋒算啦,等佢整埋先行囉!佢已經夠樣衰啦,仲唔執下佢一陣出去唔駛媾女架啦!」阿龍係度笑,嘲笑個隻笑。
「你個死仔你話,你講乜呀?!我駛媾女架咩?我行出去大把女痴埋黎啦!」
「行啦,咁多野講!仲要過去搵埋兩個男人婆呀!」阿鋒首先行左出門口。
「麻乜煩,叫佢自己死過黎啦!」把口咁講姐,咪又係行左出去。
佢地三個係兄弟黎,呢,燒晒黃紙個隻兄弟呀。咪睇佢地成日係度嘈嘈閉,有起事上黎大家都會為大家出頭架。
我同阿奈同佢地三個都算係由細玩大既,我同阿奈住隔離,而佢地三個就住我地樓上。細細個落公園玩,玩下玩下咪熟左囉。不過由細到大,我同阿奈似乎都係比佢地蝦多,真係好鬼無奈。連講多句野都比佢地串呀陰公!
我都仲好dd,阿龍同我一向無咩兩句,係都係比阿鋒一個串多。阿奈就慘啦,都唔知佢同阿龍阿sam三個係咪前世已經狗咬狗骨,今世兩個男仔都鬼咁鍾意串佢。偏偏阿奈又唔鍾意比人串喎,搞到三個人一見面就火山爆發。
「男人婆,捨得到啦咩?唔好再遲d?」
死八公,遲少少姐,駛唔駛咁呀?我忍你,一大早唔想同你開戰住。
「豬扒包!嘩!一日無見妳姐,又樣衰左既?哈哈!」see?一見面就開波啦。
阿奈啤到佢實一實,睇黎又係時候開戰。「你老母邊q個豬扒包?!你好好咩!set到個頭成隻箭豬咁!」
「我老母就梗係唔係豬扒包啦!但妳係呀嘛!我個頭呢d叫型,係妳唔識欣賞姐!」
「嘩,你呢d叫型呀?!好在我唔係你老母姐,唔係生左你d咁既樣出黎真係要喊三聲tim呀!」
「頂妳個肺呀!我老母不知幾咁愛我呢個仔呀!」
「夠啦,嘈夠未呀?晨早流流黎嘈交。」阿龍睇到佢兩個都覺得煩。
「你第一日識佢兩個咩?當佢兩個唔存在咪得囉。」阿鋒直頭理都唔理。
「邊q個唔存在呀!?」阿sam + 阿奈同時出聲。嘩,駛唔駛咁齊呀?
「行啦…肚餓呀,食埋野返學。」我帶頭行入茶餐廳。
「好過份呀佢地!」阿sam見無人理佢,個樣好唔忿氣。
「咪係囉!真係當我地唔存在喎!」
「挑!我地又黎當佢地唔存在姐!」
「算吧啦,你兩個有邊日當過我地存在架?」
「我地點樣當你地唔存在呀?」又黎,齊得佢兩個丫…
「唔係咩?日日係度鬧交,乜你地有理過我地感受咩?」阿龍鄙視。
「咪係度晒氣啦,再講落去天黑啦,啦啦臨食埋野返學啦。」阿鋒睬你都傻,一於醫肚緊要。
咁就搞左成朝,食埋野都遲晒大到lu。唔緊要,反正我們五個一向都係「例遲」黎既。咩係例遲?咪就係例牌遲到囉!
何況間野雞學校都唔理咁多架啦,最緊要你有錢交學費姐。就算佢地想理,都無人敢對我地落手。我就唔好講啦,一向我都唔多理人地講咩,但係阿鋒佢地同阿奈就唔同啦,你嘈佢一句?哼,佢嘈返你一百句呀!
作者:
tellme
時間:
2008-12-5 19:38
推````````````
作者:
銀紙安
時間:
2008-12-5 22:05
我係第二度都睇完...
好感動'''
作者:
tellme
時間:
2008-12-6 11:45
哦~
thx!
作者:
摩登現代
時間:
2008-12-6 11:53
Keep Going
作者:
tellme
時間:
2008-12-6 13:33
第一章 - 第一節 - part2
返到學校連門口都未入,已經成班女衝埋黎。
唉,好煩,日日逼到我同阿奈連企都無位企,好心佢地死埋一二邊啦。
「阿鋒阿鋒,你食左野未呀?我買左早餐比你呀!」我真係唔明,點解d女要將把聲調高八度黎講野,咁樣聽落係咪會好聽d?
「唔駛啦,我見到妳個樣已經食唔落。」睇黎阿鋒對條女無咩好感。
鬼咩,條女生到個樣成隻喪屍咁,如果係靚女既話阿鋒一早就跟左佢走啦。
「阿sam呀,我都買左野比你食呀。」嘩,成個身挨晒落去,阿sam今次仲唔食晒「波餅」?益左佢啦,條女個樣仲要唔係差架啵。
「好呀,不如我地搵撻地方慢慢食丫?」阿sam左手搭住條女膊頭,右手就拎住袋野食fing fing下,仲要黎多個淫笑。
「食就食啦,唔知食咩姐。」阿奈見到阿sam個死人樣就講。
「咪理佢姐,我地行囉。」阿sam啤一啤阿奈就攬住條女走左去。
「個個都有野食,我d女死晒去邊呀?」阿龍左望右望,見無女埋佢身就問。
「你彈開啦,你d女一早死晒係我同阿sam手啦,仲輪到你咩。」阿鋒笑,笑得好鬼死奸。
「龍仔!我同你返上去姐!」搞乜?阿奈無啦啦係度發脾氣既?
嬲爆爆既阿奈返到上課室就一直都無出過聲,淨係見佢係咁狂拍張檯,無人知佢發緊咩脾氣。
「好悶呀!有咩好呀?」阿鋒一路講就一路拍我頭。
「你悶關我咩事姐?去搵你d女啦!」唔該唔好一悶就黎搵我啦,好鬼煩呀。
「妳特別d所以咪搵你囉。」
「有乜咁特別呀?唔通我靚d呀?」sh*t!一開口就知講錯野,又比佢有位入串我tim!
「梗係特別啦…特別豬d呀嘛!」
「你條粉腸,借d意黎話我豬呀?!我豬你咪去搵你d靚女囉!仲留係度做乜姐!」乞人憎!成日話我豬,家陣我真係咁差咩!
「乜借d意呀?我本來就諗住咁講架啦,點知妳自己講多錯多,比多個位我入姐。」佢望住我奸笑,「就係見得靚女多,要搵妳呢d豬扒黎平衡下心理嘛,唔係見得多會厭架。」
「妖,你去死啦!咪煩住晒呀!」正一死人頭,成日串我好好玩咩!
「妳係咪傻架?你叫我死就死呀?邊有煩住妳姐,妳咪一樣悶到唔知做咩好。好啦…我而家去搵靚女啦,有興趣就黎望下咩叫靚女啦,豬扒。」
吼!!!激死我啦!!!順手拎起本簿一野車埋去,最好可以掟鬼死佢,咪係度阻住晒兼成日串我!!
「嘩!唔夠人串發爛渣呀?!咁粗魯抵妳一世做老處啦!」佢輕輕一閃就避過左本簿。
妖那媽!我就黎比佢激到嘔血啦!乞人憎!死人頭死人頭死人頭!
「你又知我係處?!唔比我唔係架?!PK,去媾你既女啦!」
「唔好玩啦!大家住咁近都未聽過妳屋企有呻吟聲,仲唔係老處?日日都見妳無所事事係屋企,就黎鋪晒蜘蛛網啦!唔同妳講啦老處,拜拜!」
丫!!!!由細串到我大,仲要話我無仔媾!哼!我就唔信我成世無男朋友,等我搵到個陣就威比你睇!睇住黎啦!
「點呀奈姐?悶死啦!」阿龍成個人趴左係張檯度。
「你悶關我春事呀?心情唔好咪同我講野呀!」
「喂大小姐,又係妳叫我上黎陪妳既,而家又唔講野,想點呀?」佢個樣好鬼無奈囉。
「我叫你上黎陪我之嘛,無話我一定要同你講野架喎!」係架啦,阿奈有時就係咁蠻不講理。
「神又係妳鬼又係妳,又唔知係度發咩脾氣。廢事同妳講野,慢慢嬲啦下。」阿龍講完之後就走左去。
第三堂過左之後係個小息,咁岩呢個時候阿sam就攬住條女返黎。
佢一行入門口姐,阿奈就啤實佢。做咩?
「喂豬扒包!係度做緊咩呀?」佢一野就坐落阿奈隔離,順手仲拉埋條女坐係佢大脾度。
跟住…跟住…嘩!阿奈竟然彈起身一手推開條女囉!
「做乜呀?!」
「凳呢,就一個人坐既,唔係兩個人坐既。」阿奈推開左條女之後仲要拍拍手先坐返低。
「有關係咩?咪又係坐!」
「我唔鍾意呀!得未丫!」
「妳唔鍾意關我蛋事呀!豬扒包!」
「你…」阿奈聽到佢咁講個樣即時灰晒,「無野啦…」死囉,咁耐以黎佢兩個見親面都係串黎串去既,從來未聽過阿奈會認低威,搞咩呀今日?
睇今朝係學校門口個情況,再加上佢而家既反應…佢唔係鍾意左阿sam呀?!又會鍾意得咁神化既?!我比自己呢個諗法嚇一嚇,唔係啦,都係過去八下先。
「喂,做咩呀?」我坐低。
「咩做咩呀…?」
「我問妳個樣做咩咁灰呀。」
「邊有姐…」
「咪呃我啦,妳有野唔通我睇唔出咩。鍾意左人呀?」我好似直接左d丫呵?其實我都係估估下架咋,不過唔緊要,直d好d既。
「…鍾意邊個呀…?」
「S.A.M,Sam呀!係咪姐?」我認我而家個額頭係作住個「八」字。
「邊個得閒鍾意個白痴呀!你叫佢去死啦!成日掛住媾女,媾媾媾!鬼唔望佢精盡人亡呀!」嘩…駛唔駛毒到咁呀?睇黎真係有野喎,唔係無理由咁火既。
「係呀係呀,把口咁講姐,個心又點諗呀?」
「…人地有女架啦…」唔對路,佢竟然會眼紅紅?!
「鍾意人咪出聲囉,如果唔係人地點知姐。」死啦,佢會唔會喊架?咁大個人我都未見過佢為條仔喊架啵…
其實我係咪多事左呢?如果我唔提既話阿奈可能未必會咁唔開心,不過算啦,呢d野呃到人呃唔到自己,佢自己鍾唔鍾意佢自己心理有數啦。
阿sam又真係衰d既,日日d女都係身邊四圍咁轉,仲要衰到唔理好醜但求就手,佢話呢d叫食得唔好晒喎,服左佢。
作者:
白雪一堆
時間:
2008-12-6 13:53
支持 ! 支持 !
作者:
唔高清
時間:
2008-12-6 15:31
十卜ar...
快d po la
作者:
tellme
時間:
2008-12-6 15:32
thx你!
作者:
tellme
時間:
2008-12-6 15:55
第一章 - 第一節 - part 3
話咁快又到食飯時間。
返學等小息,小息等食飯,食飯等放學。日日如是,悶到爆炸。
阿奈佢仲係好似心情唔多好咁,過左成兩堂都唔見佢講野。
「喂,食唔食飯呀?」點都要問下佢既,無理由由佢自己一個係度呆架。
「唔食啦…」
「妳唔餓咩?唔開心都要食飯架,咪搞到自己身體愈黎愈差呀。」
阿奈身體一向唔太好,成日唔係呢度痛就係個度唔舒服。
「得啦,都話唔食囉…」
「咁算啦,我出去食飯,妳有咩打比我啦。」
阿sam見阿奈仲坐係度,於是就想行埋去叫佢去食飯,點知阿奈一見到佢埋身,即時就起身走人,理都唔理佢。
「做咩呀妳?去食飯啦。」阿sam見佢好似見鬼咁,就跑快兩步追上去拉住佢。
點知阿sam隻手一掂到阿奈,阿奈就一野fing開佢,「咩事呀?!」
「駛唔駛咁大聲丫妳?!好心行過黎問妳做咩姐,唔鍾意咪唔好答囉!」
「我點都唔關你事架啦,咁關心我拓呀!同你d女去食飯啦!」
「發乜神經呀妳?!痴左線呀?!」
妖,阿sam你唔係咁q蠢下嘛!明眼人都睇得出阿奈係度呷緊醋啦!
就係全場人望住佢兩個等待下一步個陣,阿奈突然之間喊左出黎!死啦!點算呀!?見到既人都呆左囉,從來未見過阿奈喊架嘛!
「…做咩呀?無啦啦喊…」阿sam都比佢嚇左跳,即刻拉一拉阿奈隻手。
阿奈又唔出聲,又唔比反應佢,淨係望住個地下係咁滴眼淚。
「唔好嚇我啦,咩事姐?」估唔到個死仔都有d溫柔,見到阿奈喊都識得氹下佢。
「…無…無野…」口窒窒,話無野都無人信啦。
「無野就唔會喊啦,講啦…咩事姐?」
「我整親隻手之嘛…」
唔係掛?奈小姐妳個大話都好似大左d喎。
「整親隻手妳會喊架咩,咪玩啦。」阿sam苦笑左下。
「痛丫嘛!痛唔比人喊架咩!」
「呃我呀妳?!平時更傷更痛都唔見妳喊啦!」
知奈者莫若阿sam也!果然小小事都可以睇得出阿奈有問題。
如果你以為阿奈喊呢下已經比足我地驚嚇性個陣,咁阿sam下一個動作就足以令我地暈低!
因為我地竟然見到佢拎起張紙巾同阿奈抹眼淚囉!識佢咁耐都未見過佢對一個女仔咁溫柔架囉,何況個個仲要係阿奈tim!
「唔好喊啦,我睇唔慣妳喊個樣呀。去食飯啦好無?」
「你梗係睇唔慣啦…你不嬲都當我係男仔…」阿sam唔抹仲好d,一抹阿奈喊得仲西利,「我唔食啦,你去搵你d女陪你啦…」
「…妳…唔係係度呷醋嘛?!」
死白痴!係人係鬼都睇得出,你唔係白痴到而家先發現嘛?!唔好再問得直接d?咁問叫阿奈點答你啵!
「係呀!咁又點呀!都唔關你事架啦!」阿奈突然大叫。
在場既人都比佢嚇左跳,當然唔少得阿sam啦。全場靜晒,個個都唔敢出聲,連呼吸都唔敢透大啖d,個個都等待緊下一步發展。
「…下…?」Sam哥仔你唔係食左遲鈍丸呀?呆左十幾秒先識反應既。
「仲下乜鬼呀!?人地話鍾意你呀!」見到咁既場面,阿鋒第一時間梗係搭嘴啦,有得玩佢仲唔玩過夠本咩。
死仔包咁多口做乜姐!邊有人話過佢鍾意阿sam姐,佢只係認左自己呷醋咋嘛!
「下下下?!」阿sam明顯嚇傻左,隻眼大到就黎趺出黎咁滯。
「仲下!」
阿奈見到阿sam咁既反應,即時拋低左句「…無野啦…」之後就行左出課室。
身為佢好姊妹既我梗係第一時追出去睇下佢有無事啦,當然我認我有一半係八卦成份黎既,嘻。
「點呀妳?」
「無野,比我靜下…靜下我就無事…」
無奈,咁既樣有排靜啦,咁大個女都未見過佢為個男仔喊。正確d黎講係都未聽過佢鍾意人,佢由幾時開始鍾意阿sam架呢?聽都未聽過佢提起過,又會無啦啦咁就鍾意左既?唉,又多條女死係阿sam手上啦,呢次仲要係我姊妹tim,真係無眼睇。
「行啦,去食飯,就黎餓死。」八緊個陣又唔見你咁講?
「你地自己去食啦,我唔食啦。」呢次輪到阿sam玩無胃口。
「你又玩自閉呀?」阿龍問。
「得啦,你地去啦。」
「由佢啦,我地行啦,我就黎餓鬼死啦。」阿鋒拉住阿龍走。
就係咁,我同阿鋒阿龍三個就行左去茶記食飯。
「唔知阿sam會唔會受媾呢?」阿龍去到茶記坐低,第一時間就發表疑問。
無錯,我地仲係度八緊呢個話題。咁的確係出人意表喎,八多陣都正常姐。
「我都想知。」阿鋒一路睇餐牌一路講。
真係無聊,想知咪去問囉,坐係度就會知架啦咩。
「你估阿奈會唔會真係做左我地阿嫂丫啦?」
「咁呢個要問阿sam哥仔啦。」
「你兩個好無聊呀,想知又唔去問。」我忍唔住講左句,順手搶左阿鋒個餐牌。
「問得出就問左啦,白痴!」阿鋒一野就搶返份野,跟手仲拍左落我個頭度。
「邊個白痴d呀?又係度叫肚餓,黎左又唔叫野食,仲要打我tim!」
「邊個答我咪邊個白痴d囉!都未睇點叫野食呀?!用下妳個豬腦好唔好?!」
X屮屮屮屮屮Y佢!!!激死啦!!!
「唔好理佢姐,我地叫野食。」
佢佢佢佢!!!佢真係唔理我就同阿龍兩個自己叫左野食先囉!!!
我就黎嘔血啦!!!Help!!搵人救救我唔該!!
作者:
唔高清
時間:
2008-12-6 15:56
引用:
thx你!
5洗thx la^6^
作者:
tellme
時間:
2008-12-6 19:02
作者:
tellme
時間:
2008-12-6 19:02
第一章 - 第二節 - part 1
阿sam無去到食飯,反而上左天台狂煲煙,唔知係度諗緊咩呢?
樓梯傳黎上樓梯既聲,係今朝同阿sam去「食早餐」個個女仔。
「阿sam你係度做咩姐?唔開心不如等我陪下你啦。」又係送「波餅」個招。
唉,真係唔明而家d女諗咩,一見到型d靚d既就飛到咁埋去。雖然我同阿奈都鍾意靚仔型仔,但我地從來都只係昅咋,而家阿奈鍾意左阿sam就無得講啦,但起碼都唔係叫做自動送上門呀。
「行開啦,唔駛妳陪呀。」語氣有d重,睇黎心情真係唔係幾好。
「講啦,有咩事我可以同你分擔架喎。」擔…唔知擔咩呢但係。
「妳邊位呀!要妳同我分擔?!多謝晒喎!」
「耶,你好衰架!唔好咁啦。」
嘔!真係想嘔,佢「耶」個下真係姣到阿媽都唔認得囉。
「彈開啦!姣婆!」
「你今朝都唔係咁講架,仲話好鍾意tim。」人地都講到出面啦,條女仲要係度挨身挨世,想話佢唔係發姣都幾難。
就係呢個時候,阿奈咁岩又行緊上天台諗住食支煙。一打開度門就見到阿sam同條女企左係度,雖然距離有d遠聽唔到佢地講緊咩,但係憑動作就咁睇,阿奈以為阿sam又同條女係度搞緊野,即時就轉身跑返落樓下。
死仔,你盲架咩!咁大個人影都見唔到!
「喂,不如你問下阿sam鍾唔鍾意佢啦…」一路食飯我就一路諗,咁樣落去都唔係辦法,都係叫阿鋒問下當事人好d。
「問黎都晒氣啦。問左,佢答唔鍾意既,咁妳講唔講佢知好呀?」
「咁又係…」我嘆左口氣,「但係見到阿奈咁既樣,連我都覺得唔好受…」
「邊理得咁多呀?妳理掂妳自己先啦,男人婆。」
「好啦喎你!做咩又燒埋我度姐!」激鬼死!好聲好氣同佢講野都要串我既。
「鬼叫妳八卦呀?妳唔出聲咪唔會比我串囉。食快d啦,食完返學呀。」
「你…你個賤精你話!乞人憎!」再咁落去我真係遲早比佢激死。
「我賤我認,我賤妳都同我講野妳咪仲賤?低能。」
「……」無言…我唔知可以再講d咩,完全係比佢呢句技術性擊倒囉。
唉…嘔血…丫,唔係,係噴血先岩。
當我地食飽飯返到學校想行上課室個陣,竟然就比我地發現阿奈坐左係樓梯度。
「妳又做咩呀?無啦啦坐係度。」我走埋去佢身邊問。
阿奈佢無出聲,一望佢隻眼…嘩!即時嚇親我囉!搞咩黎呀?!比人打呀?!紅到咁既?!
「妳無事呀?!隻眼咁紅既?!」我見佢擰左下頭又繼續問,「唔好咁啦…話我知咩事好無?」
「咁八做乜丫,一睇就知佢喊過黎啦!返上去啦!」
你個死仔出少句聲無人話你啞架!鬼唔知佢喊完黎咩,就係唔想佢喊先係度陪佢咋嘛!
「…返上去啦…我靜下無野…」又係靜下無野,話無野就假既,不過比佢冷靜下都好。
「咁我返上去先啦…妳靜完好返上黎啦,唔係我會擔心架。」
個死仔sam又唔知同阿奈講過咩黎啦!搞到佢隻眼仲紅過頭先!
我地返到上課室都見唔到阿sam,直到上堂上到一半佢先見人。
「你個死仔去左邊呀?」阿鋒問佢。
「係天台煲煙之嘛…」
「去搞野呀?」阿龍問得漫不經意。
「搞咩呀…?」
「你無野呀?反應差左咁多既?咁都唔明我講緊咩?」
「咩呀?都唔明你講咩?」
阿鋒見阿龍係度打亂哥柄,就將阿sam拉埋一邊問,「你又同佢講過d咩呀?」
「邊個佢呀?講咩呀又?」阿sam個樣有d唔耐煩,似乎阿奈件事對佢都好大影響下。
「奈呀!頭先返黎見佢坐係樓梯度喊到隻眼腫晒呀!仲唔係你同佢講過d咩?」
「我邊有同佢講過野姐?我成個lunch都係天台…」阿sam講到一半停左落黎諗,成間學校得天台係我地經常去既煲煙地點,頭先阿奈會唔會咁岩又走左上去,點知見到條女同佢攬身攬世,以為佢又同條女搞野,跟住傻到走返落黎喊呢?當佢諗到呢度個陣佢已經衝左出門口去搵阿奈,就連係後面叫住佢既阿鋒都無理到。
阿鋒見到咁梗係無癮到爆啦,鬼咩,都未八夠個當事人就走左去,八鬼八馬咩。
去到樓梯既阿sam見阿奈一條友坐係度,靜靜雞就行左埋佢隔離坐。但佢無講到野,亦都無做d咩,大概係想阿奈先開口掛。
「你…黎做咩…?」明顯阿奈死忍緊d眼淚,睇佢講野仲係窒下窒下就知。
「妳頭先上左天台?」
阿奈聽到呢句真係想大喊,一諗起頭先個幕佢就心都嗡埋。
「見到我同條女係度?」
如果我係度我真係會鬧鬼佢囉,有無搞錯呀?見到佢喊成咁仲要刺激佢!?
阿奈烏低身,愈喊愈傷心愈唔比自己出聲。
阿sam見到佢咁,本能反應就攬住左佢。「傻妹唔好喊住先啦…」
「我無野…你返上去啦…」無野就假,聽把聲都聽得出仲喊緊啦。
「我問妳,妳係咪鍾意我?」喂喂喂,你而家先黎問會唔會遲左d呀?
「咪痴線啦,點會鍾意你姐。」阿奈起身想走。
大話呢,呃到人就呃唔到自己既,係唔鍾意就唔會喊成咁啦。
「真係唔鍾意我?」呢招係咪叫做死纏爛打呢?「我頭先諗得好清楚,」轉個背佢就係後面攬住阿奈,「我覺得我地都係…」講清楚d好唔好?吞吞吐吐咁。
「得啦,我無野呀,我明架啦。」阿奈出晒力想fing開阿sam。
「做咩姐?我都未講完,」佢拉住阿奈,面對面望住佢講,「我想話我覺得我地都係拍拖好d呀。」
「…唔…唔好玩啦…」轉變咁大,一時之間難接受係正常既。
「邊個同妳玩姐?妳知我咁耐以黎都未叫過其他女做我女朋友架,妳係第一個。」
做乜鬼呀阿奈妳!出聲啦!佢而家媾你啦,比少少反應好唔好!?
「點姐?做唔做呀?」阿sam低頭望住佢。
「…是但啦…」口不對心咪就係呢d囉。
「有得是但架咩?我係要親耳聽到妳話做呀,然後叫多聲我老公先得。」口花花係佢強項,難怪咁多女死係佢手上啦。
「下…?」阿奈好似唔係好頂得順啵,塊面開始泛紅。
「下咩姐?做就講啦,乖。」陰聲細氣仲要鬼咁溫柔,唔死就奇囉。
「…做囉…」阿奈把聲愈變愈蚊滋。
「咁叫聲老公黎聽下先啦!」呢條友仔,真係比佢笑死。
「…老…老…老公…」
「係老公,唔係老老老公,叫多次。」
「…老公…」噢!God!阿奈變左隻小綿羊啦!
「老婆,」阿sam笑左下,然後痴埋阿奈耳邊細細聲講,「我愛妳…」
死囉,好彩我唔係現場姐,如果唔係我一定會嘔死囉,肉麻到咁。
「返上去啦…夠鐘上堂啦…」哈,有人怕羞啵。
「頭先又唔見妳咁講?唔得呀,我要錫返啖先。」
阿奈本來想出聲反抗,但係佢未講到野之前,阿sam已經一啖咀左落去。哈哈,唔知阿奈暈未呢?
佢兩個真係有夠戲劇化,咁就係埋一齊lu。
作者:
花海
時間:
2008-12-6 20:35
呵呵~好想睇落去~快D po喇~十卜
作者:
tellme
時間:
2008-12-6 20:49
第一章 - 第二節 - part 2
差唔多到就黎放學個陣,先至見到阿sam阿奈兩個拖住手仔返上黎。
咦咦咦!?拖住手仔?!再望下阿奈個樣,嘩!蕃茄上身呀!
阿鋒、阿龍同我見到都呆一呆囉,我相信個一刻有個疑問同時間係我地三個腦入邊升起:唔係咁快就係埋一齊下嘛?!
「喂,你兩個仲唔過黎叫阿嫂?」
阿鋒第一個有反應,即時就搵隻手指撩下隻耳,睇下有無聽錯野。「我無聽錯嘛?你叫我叫邊個做阿嫂呀?」佢簡直就愕晒然啦,咁多年黎都未聽過呢句喎。
「我而家攬住邊個咪邊個囉!」
「…阿…阿嫂…」阿鋒的確好唔習慣,突然之間就多左個阿嫂喎。
「龍仔,到你啦。」阿sam一邊滿意地點左下頭,一邊望住龍仔講。
「做咩要叫?」奇怪,阿龍由頭先知道阿奈鍾意阿sam開始,一直個反應都係冷冷淡淡咁──除左八卦個陣。
「咁你而家係咪唔叫呀?」
「係呀,吹咩。」
「你個死仔你話,咁都唔比面。」
「算啦算啦,我地返過去坐啦…」阿奈一方面幫阿龍解圍,一方面佢都比我地望到唔知做咩好,唯有盡快返位坐啦。
「好,今次就聽老婆話,下次要叫架啦。」阿sam攬住佢行返埋位。
「睇黎個死仔今次黎真!」阿鋒係我隔離細細聲講。
「我都係咁話,咁耐以黎都未聽過佢叫d女做老婆既。」
「係囉,我真係趺晒眼鏡,我仲以為佢會唔show阿奈tim。」
「而家咪幾好,阿奈佢幾開心呀。」望到阿奈個笑容就知佢而家有幾甜啦。
「做咩呀妳?唔抵得呀?」
又黎啦,救命。
「我有話過我唔抵得咩!?」
「一睇妳個樣就知妳唔抵得啦男人婆!算吧啦妳,睇黎呢世都無人要妳架啦!」
「就算真係呢世都無人要我都唔會揀你呀!」
「唔好意思喎,就算妳揀我我都唔會要妳。」
…點解!點解次次都唔夠佢黎…算啦,我都係出少句聲,免得比機會佢再串我。
咁耐以黎我係佢地面前都打扮得好男仔頭,無他既,放便活動嘛,自己又唔係太鍾意咁女性化呢。有時求求其其一件T加牛仔褲咪算囉,再加上自己又唔會好似其他女仔咁溫溫柔柔細細聲咁講野,所以佢地咪一直以黎都當我男仔囉。
雖然我係眼淺,見到其他唔開心既野咪會喊囉。但就同阿奈一樣,從來未試過為其他男仔喊,或者係我未搵到個鍾意架啦。
而家眼見個好姊妹都有拖拍啦,自己都仲係孤伶伶一個人,話就話唔在意呢d野姐,但唔多唔少都會想有個人追下架嘛。唉,都唔知幾時先搵到個我愛佢佢又愛我既男仔。唔係真係比個死人鋒講中嘛,呢世都要做老姑婆咁陰公?!
「喂,今晚去邊呀?」放學時間,阿sam攬住阿奈行過黎問。
「問黎都多餘,仲有邊度去呀?」阿鋒啤左佢一眼。
「咁即係落D啦。」
「知就好啦,仲問。拍一拍拖唔係咁快就傻左嘛?」
「問下係咪唔得呀家陣?」
「廢事理你。」
咪睇佢地三個係學生哥,其實咪又係古惑仔一名。
阿鋒個老豆老母死得早,留低佢同嫲嫲兩個人過。阿龍呢,就聽聞佢阿爸好早死左,阿媽又唔知係邊個,細細個就流落街頭度做孤兒仔,係阿鋒個嫲嫲帶佢返黎先無餓死街頭。
佢地三個之中,阿sam算係家庭環境最好既一個,阿爸阿媽尚健在。
三個o靚仔,細個屋企成日無人管,玩下玩下就跟左人,行左咁多年都算有返些少成就啦。
最緊要係三個都肯博肯打,個大佬又睇得起佢地,比左間D佢地做下睇場咁。行到出黎都有人知佢地個名架,無他,鬼叫個大佬錫住佢地呀?得力助手啵,又有邊個敢得罪?
~~夜晚~~
又係時候開始五光十色既夜生活啦。
幾乎晚晚我同阿奈都跟住佢地落D,係屋企悶嘛,但其實我落去都一樣係咁悶。
以前佢地三個各自各媾女搵食兼做野,我仲可以同阿奈玩下吹下水跳下舞咁,而家就連阿奈都掛住同阿sam拍拖。唉…咁既生活,你話悶唔悶?
「老婆,我同妳出去跳舞囉。」
「嗯。」佢兩個懶恩愛咁,老公前就老婆後,齊齊拖住手仔行左出去跳舞。
阿龍就係另一邊媾緊女,唔好意思,係比女媾緊先岩。
淨返條蛋散同我坐左係度,係架啦,係鄙視佢架啦,鬼叫佢把口咁衰。
「喂,妳唔出去跳舞?」
「唔想出咪唔出囉。」多鬼餘,唔跳舞要有理由架咩。
「好鬼悶呀。」
「咁你想點丫?」語氣係唔多耐煩架啦,下下悶先搵我,我夠悶啦。
「無咩想點,問下妳有咩好做姐。」
「無呀!你去媾女啦!」
「我要媾女架咩?d女自己走埋黎咋。」
「係啦係啦,巴之閉啦。」無佢咁好氣。不過佢又的確係好靚仔既,笑起上黎個陣個樣仲吸引。又靚仔又出名,加上都算搵到個錢,搞到好多女都自動獻身想做佢條女。可惜鋒哥仔鍾意玩玩下,咁耐以黎都唔知有幾多女為佢傷心。
作者:
唔高清
時間:
2008-12-6 21:13
好睇ar^^
期待ing...
作者:
tellme
時間:
2008-12-6 21:32
第一章 - 第三節 - part 1
~~第二日~~
蒲完一晚攰到七彩,所以今日個個都無返學,訓到中午三點幾先捨得起身落樓話搵d野食下。
「紅色炸彈。」阿龍將收到既紅色信封拎出黎。
「嘩,邊個架?」
「阿言今朝比既,仲突登走上黎我地度,阻鬼住晒我訓覺。」
「唔係掛?阿言個死仔結婚?!」阿sam聽到即時大叫。
「有咩咁出奇姐,佢同條女都拍左七年啦。」
「佢唔係話唔結婚架咩?又話結婚唔知為乜?」
「到佢有得唔結咩而家?條女有左呀!」
「唔怪得之啦,仲以為個死仔無啦啦玩做老襯tim!」
「其實都係時候啦,反正都拍左咁耐囉。」阿鋒搭嘴。
「點同呢,拍拖還拍拖,拍拖個陣仲可以逢場作興嘛,結左婚仲邊有得玩?」阿sam一路講一路繼續埋頭食野。
「哦,乜拍拖仲可以逢場作興架原來?既然係咁我又去作下興先,你地慢慢食啦喎。」阿奈聽完佢句野之後就講。
哈,估唔到拍左拖都仲係度你串我我串你,有趣。
「妳去乜鬼呀?我講就咁講姐!又唔見我玩?!」
「咁惡做咩呀!!!」
「嘩!河東獅黎左,閃人!」阿龍一見佢發火,即刻閃埋一邊諗住坐定定睇戲。
不過…龍仔阿龍仔,你太低估「河東獅」既威力啦。佢句說話一出咋,閃都未閃到已經比阿奈追住黎狂打啦。
「o靚仔,慢慢受啦。」阿鋒拍一拍阿sam膊頭。
「係喎,要去飲咪要去造禮服囉?」阿龍禁停左阿奈之後係度問。
「唔駛搞到咁隆重呀?」
「阿言話要請我地去做兄弟喎。」
「咁即係要去啦,咁食飽就行啦,唔好講咁多。」阿鋒發揮司令。
阿sam見坐係一邊面黑黑既阿奈,即時攬住佢同佢講:「老婆一齊去啦。」
「唔去!做咩要去呀我!」
「咁妳係我老婆嘛,梗係要去啦。」
「係你老婆又點呀?」
「係我老婆就要去囉,去介紹比d兄弟識嘛。」
「哦…去囉…」哈,氹兩氹就搞掂。
「咁就乖啦,錫晒你。」
妖,佢兩個真係好鬼肉麻兼夾嘔心。
「男人婆,妳都去啦。」
「去邊呀?!」我的確有d狀況外,事關我好專心、努力咁食緊面前碗好好味既通心粉。
「叫妳去飲呀,咁妳係咪唔去呀?」
「我又唔係邊個條女,做咩要去?」我反問,心諗都痴痴地既。
「一定要係邊個條女先去得架咩?妳去到都無人當妳女仔架啦,男人婆!」
做咩係都要話我男人婆姐!吼!
「三九唔識七,去黎做咩?」
「我識你,龍仔阿sam佢地都識你就唔算唔識啦,得啦,幫妳決定埋妳去。」
「咁…」我仲想反駁落去。
「無得到妳咁呀,行啦。」佢一手就拉左我行。
野蠻人!生番!外族!而家係你叫我去呀,仲要夾硬黎!人地都話左唔去啦,死都要拖人地行!乞人憎!仲有我碗通心粉呀!咪食完架嘛!還我通心粉呀!
雖然去飲都好,橫掂d禮金又唔駛我比,自己一個係屋企又係悶。但係咁啵,要著晚裝個d去咪好女人囉?我唔得架喎…算啦,去到間野度睇下點先再算啦,話唔定可以叫個sales幫我搵套男仔頭d架姐。
~~婚妙舖~~
「喂,呢件好唔好睇?」阿鋒拎住件黑色禮服問阿sam。
「件件都差唔多架啦。」差唔多你又係度左睇右睇?
「麻煩,我一早揀好啦。」
「你著出黎都無咩人會睇架啦,揀咩都係咁上下。」嘿,龍仔又比阿鋒串。
「咪係囉,靚仔你又唔夠佢黎,型你又唔夠型。」阿sam見機仲要踩多一腳。
「挑!我又唔信我無女媾。」
「無人話你無呀,少d之嘛,仲要d質數…嘿嘿!」
「揀好未呀?揀好去試啦。」
「得啦,行囉。」
由細到大都未見過佢地著得咁隆重,唔知佢地著起西裝上黎好唔好睇呢?
最好阿鋒就著得醒目d,如果唔係為左我碗通心粉之仇,我一定會串死佢。
「奈妳揀好未呀?」
「未呀,等佢地出黎先算啦,花多眼亂。」
「套套都咁女人,我點揀得落手呀?」真係好難揀,唔係低胸就露背,再唔係就短裙仔,我唔得架,我著呢d實走光架。
「咁係女人著既就梗係女人啦,多餘!」
「呢d岩妳著架姐,邊岩我架?」睇黎睇去都覺得無件岩我。
我無前又無後,又肥又大隻,著起上黎咪成個山東婆咁?!一陣變左成個龍咁威入面個大家姊咁咪死得?!唔制!咁既樣我未報仇就實比阿鋒串死啦!
其實去飲姐,唔駛著成咁呀?求求其其咪算囉,最多我考慮將櫃底個條長裙拎出黎著啦。
作者:
唔高清
時間:
2008-12-6 21:51
快d po..
十卜你^^
作者:
tellme
時間:
2008-12-6 21:59
第一章 - 第三節 - part 2
等左幾個字,阿鋒佢地終於換好衫出黎啦。嘩,唔望都無乜野,一望就嚇親我。估唔到佢地幾個著起套老西上黎仲型左囉!尤其係阿鋒,簡直成個吳彥祖既化身咁!sh*t,咁既樣我咪無得報通粉仇囉?!何況…做乜我會望住佢望到眼都唔斬既?!仲有種心跳加速既感覺tim…我唔係因為佢呢個造型而鍾意左佢呀!?痴線!做咩我會有咁既諗法架!唔會既,一定唔會既!幻覺黎架姐,嚇我唔到既!佢隻死人樣我都睇慣睇熟架啦!點會以前唔鍾意而家先黎鍾意呀!我先無阿奈佢咁神化!
「…老公…」阿奈見到阿sam著西裝個樣都呆左,仲要面都紅晒囉,哎,真係頂佢唔順。
「嗯?」阿sam企係佢隔離望住塊鏡拉拉件衫。
「你…好型呀…」好嘔心既對話,想死。
「哈,我知呀傻妹。」佢兩個又攬埋一舊啦。自從拍拖個日到而家,佢兩個幾乎廿四小時都痴埋一齊,真係恩愛到暈囉。
「妳地仲未揀好呀?」
「未呀,花多眼亂。」嘩,溫柔得佢丫,平時又唔見佢用咁既聲氣同我地講野!?
阿sam望左一陣,隨手就拎起件粉黃色既吊帶連身長裙,「就呢件啦,妳著起應該幾靚。」又的確揀得幾好既,阿奈既身材幾好,身高又唔算太高,著起長裙拉高左佢會顯得更加清瘦,「去換黎睇下。」
「嗯。」真係聽話,拎左條裙之後就啦啦臨去換。
而我…唉,咪提啦,依然未搵到件岩既。
「喂,揀咁耐架妳。」
死人頭行過黎乜呀?我唔慣同著到咁既你講野呀,走開走開!
「揀唔岩咪揀得耐囉…」搞乜自己講野態度軟化左架?!你仲有仇未報架!清醒d!咪比機會佢先得架!
「是但啦,反正妳著咩都無人睇架啦。」
「……」串佢啦!串返佢啦!佢而家串緊你呀!搞咩唔出聲呀!
「呢件啦。」佢貌似求其咁拎左條裙就塞落我度。
我一睇即刻眼都突埋。唔係掛?!一條湖水藍色既及膝裙,前面低胸後面露背,側面仲要黎多個叉,咁鬼暴露叫我點著上身呀?!
「仲企係度做咩姐?去換啦」佢一手就推左我入更衣室。
話佢生番、野蠻真係無錯架!成世都唔肯聽人講野!我野都未講咁快推我入黎做咩姐!
望下手上面條裙…我真係有d懷疑囉,咁鬼細件岩唔岩著架?一陣著爆左咪好瘀?!出去個陣又要比佢地笑,仲要賠錢喎!唔係啦,都係叫阿奈黎睇下先好d。
輕輕打開度門,出面無人啵。
「喂阿奈,你係唔係度呀?」我盡量壓低把聲問隔離。唔大聲得架,如果唔係比阿鋒聽到又會話我婆婆媽媽架啦。
「做乜呀?妳仲未換好呀?」佢突然企左係我度門前面,妖,嚇死。
「乜妳咁快換好架啦?」
「做咩妳仲唔換呀?」
「我唔知件衫岩唔岩著呀…」
「點會唔岩姐?」
「好樣衰喎,成世人都未著過d咁既衫,我又肥…妳知啦,一齊著爆左會比阿鋒笑架嘛…」
「有咩咁樣衰姐?大把人都係咁著啦,咪煩啦。」
「不如妳唔好出去搵佢地住,等我換出黎比你睇左先啦…」
「哎,好啦好啦,快d呀!」
就係我係入面咁岩換好條裙想開門出去之際…
「喂,妳得未呀?!咁q耐既?!」
一聽到阿鋒把聲,我即刻「呯」一聲閂返度門!死啦,點解佢會係度架!咁樣著住出去,會唔會比佢笑架?!
「佢驚比你笑呀。」阿奈一見到佢就講。
妖,唔好踢爆我得唔得呀!?明知我最怕比佢串都仲要踢爆我,唔係姊妹黎架!
「痴孖筋,有咩咁好笑姐,出黎啦!」
好啦好啦,反正都係死,要死都要死得英勇d!出就出啦!
我深呼吸左啖,鼓足勇氣一野推開度門!
一出黎,全場,靜晒…喂,咩事呀?搵人講下野好喎大佬…我好驚喎…唔係真係咁樣衰姐下嘛?
「好索…估唔到妳平時收收埋埋都幾有料到。」阿奈第一個有反應。
拜託!我完全同個「索」字扯唔上關係啦!
「睇唔出妳身材都幾好。」阿龍係第二個有反應既,但佢個答案仲令我驚訝!
「佢平時著黎著去d衫仲大件過我著個d,梗係睇唔出啦。」
我o晒嘴,乜…我有佢地講得咁好咩…心諗中…我一d都唔覺囉…
最奇怪既係,我出左黎咁耐阿鋒竟然都無開過聲,我仲以為佢實會串我tim。下意識偷望左佢幾眼,見到佢只係望左我一陣之後就調頭走左出去。
做咩呢?係咪我真係著得太樣衰所以佢都廢事話我呢?
「喂,岩就行架啦,攰到死。」
「行囉。」阿鋒鬆左下膊頭就向前行左去。
「無野做啦嘛?無我就同老婆去行街架啦。」阿sam問。
「你咪去囉。」
「咁得啦,今晚照舊啦。」
「嗯。」阿鋒揮左下手,「龍仔你有咩地方去?」
「我?咪去d女度囉。」
「今晚見啦,咪搞到唔識返黎。」佢笑左下。
「得啦,拜。」
個個都走晒,得返我同佢兩個企左係度,「咁我地而家點呀…?」自從出左黎之後我地就無講過野,個感覺好怪呀,平時都唔係咁既。
「有咩點呀,無地方去咪返屋企囉,妳想去其他地方咩?」
「下?唔係呀…」
「唔係就行啦。」
個感覺好唔自然囉…平時我實同佢串黎串去架嘛,做咩而家我好似食左屎咁咩都講唔出架?佢又係,見到我著條裙應該會串我樣衰呀、肥呀、山東婆呀咁架嘛,又會粒聲都唔出……
「老婆,妳想去邊度行呀?」一路行阿sam就一路問。
「是但啦,你想行咩咪行咩囉,反正呢度我地都成日黎。」
「咁呀,妳係度等我一陣,我去買d野就返黎,好快!」
「去邊呀?」
「總之妳等陣啦,唔好行開呀!我好快返架咋!」佢講完之後就一支箭咁走左去。
阿奈企係度等左成三個字,等到佢開始唔耐煩,d煙食完一支又一支都仲係未見人。終於等到忍唔到,佢拎起個電話打比阿sam。
(接駁鈴聲:如妳若有事我會很寂寞,我獨個行樂怎可快樂…)
「喂?」電話另一邊傳黎阿sam上氣唔接下氣既聲音。
「你去左邊呀?」
「擰轉身睇下妳咪知囉。」
阿奈聽到即刻就擰轉身,一睇,呆左。
企係佢身後既係阿sam,佢拎住戒指傻更更笑笑口咁望住阿奈。
「Sorry呀,要妳等咁耐…」佢仲係度喘緊氣,梗係買完隻戒指之後就跑返黎啦。
「你…做咩…」阿奈望住佢手上面既戒指,又望下佢。
「我突登跑去買返黎架!妳唔鍾意都要要架啦!」
「傻佬…」阿奈忍唔住笑左出黎。
「o拿!帶左隻戒指之後就代表妳呢世都係我架啦!」佢捉住阿奈隻手帶左隻戒指落去,「雖然我而家未正式娶妳,但相信我,終有一日我會娶你!」
「…都唔知你係咪對住個個女仔都係咁架…」把口咁講,但個笑容已經甜到漏lu。
「梗係唔係啦!我只係對住妳一個先會咁…」
「係啦…」
「我愛妳…」
哎呀!真係骨痺!不過愈骨痺愈好,咁先顯得佢地恩愛、幸福丫嘛!
作者:
唔高清
時間:
2008-12-6 22:00
十卜十卜,,,,,,
作者:
tellme
時間:
2008-12-6 22:47
第一章 - 第三節 - part 3
~~夜晚~~
每逢夜晚我地就會落樓下間茶餐廳度食飯,基本上個度可以話係我地既飯堂黎架啦。加上阿鋒佢地同班兄弟成日都係度聚腳,所以無論同d伙計定係個老闆娘,我地都已經混到熟晒lu。
「龍仔,阿sam呢?」
「盲架?唔係度即係未到啦。」
「你傻架?唔見人就代表佢未到架啦?***知佢會唔會去左廁所或者去左買野。」
「係係係,你岩你岩。」識收聲都算你醒目,唔係既話又會未食飯先開餐架啦。
「打個電話比條粉皮先。」
(接駁鈴聲:如妳若有事我會很寂寞,我獨個行樂怎可快樂…)
「喂?」
「喂,你死左去邊呀?」
「而家咪落緊黎囉,吹!行路都要時間掛?!」
「快啦!」
三個字之後,阿sam終於落到黎。
「捨得黎啦咩?等左我成幾個字。」
「頭先條女話想食魚蛋咪落黎買左比佢先囉,咁咪遲左囉。」
「你今次玩認真架?」阿鋒聽到佢話去買野食比條女,個樣好似好出奇咁。
「好出奇咩?」
「我真係覺得好出奇囉,估唔到一個情場浪子竟然會玩認真。」
「痴線,玩咁耐咩都玩夠啦。」
「嘩!乜原來你都會覺得玩夠架?我以為你唔會tim!」
「車!你個陣夠玩認真啦!係你一直見唔返佢先繼續玩女姐!」阿sam呢句一出,大家即時靜左落黎。
「死仔,講錯野啦,食野啦。」阿龍見唔對路,即時解圍。
「邊有講錯姐,呢d野遲早都要講架啦,何況我唔提佢自己都會諗架啦。」阿sam反駁。
「由佢啦,反正呢樣野我點都忘記唔到…佢講得岩既,佢唔提,我自己一樣會諗起…」阿鋒既眼神突然有d空洞,就好似係度回憶緊以前某d野咁。
「話時話你仲有無搵佢?」
「無…佢阿媽唔比我搵佢。」
「唉,佢老母又係既,都咁耐啦,咩都過左去啦。」
「唔怪得佢阿媽既,係我搞到佢個女咁…」
「你又唔好傻啦!邊個會想發生d咁既事呀?你估你個陣唔傷心唔嬲咩?」
「咪係,」阿龍飲左啖酒,「你鍾意得佢你都唔會想佢咁啦。」
「我地都好耐無見佢啦,唔知佢而家點。」
「…我…都好想知…」最後個「知」字,幾乎細聲到聽唔到。
「算啦,佢終有日記返起你就會黎搵你既。」阿sam見到阿奈行入黎既身影,「呢頭講完呢頭散,阿奈佢地到啦,唔好再講啦。」
作者:
唔高清
時間:
2008-12-6 23:17
sup^^
快po
作者:
tellme
時間:
2008-12-7 13:34
第一章 - 第四節 - part 1
「係度講緊咩呀?」阿奈行入黎就好自然咁坐低係阿sam隔離。
「無呀,吹下水之嘛。」
「吹水吹到我地一黎就靜晒?係咪有野唔比得我地知?!」
「邊有姐,咪亂諗啦。」
「你唔准呃我架!比我知道你有野呃我你就死!」
「係啦係啦,唔敢呃妳呀女皇大人。」
「喂阿ka,做咩仲唔坐呀?」阿奈見我仲戇居居企係度就問。
其實我唔係唔想坐,只係唔知應該坐邊姐。
阿奈一定係阿sam坐埋一齊架啦,阿龍就夾住係阿sam同阿鋒中間,得返阿鋒隔離個位…但係…我又唔係好想坐佢隔離喎…
平時我實諗都唔諗就坐落去既,之不過今日…
「做咩呀?」阿鋒望住我。
「下!?無無無。」都係乖乖地坐低好,唔係一陣又比佢串架啦。
「啦啦臨食埋野走啦。」
「得啦,吹吹吹!」對於阿奈黎講時間就等於廢物,佢理得你一陣仲有咩要做丫,總之就黎一個慢條斯理。
「咪係囉,比我老婆慢慢食得咪唔得姐?」
「得實得架,你地慢慢囉,我走先。」阿鋒講完之後真係起身走左去。
「佢發乜神經呀?」
「由佢啦,佢有心事。」
有心事?睇佢既背影好似唔多開心咁,唔知咩事呢?
做咩呢?我做咩要去關心佢?佢唔開心,我心情都好似跟住佢一齊低落咁,但係佢有咩事都唔關我事啦!做咩我要係度諗黎諗去?另一方面,我又真係好想知道佢發生咩事tim…但係又無理由走去問佢架?
「阿龍,佢咩事姐?」唔問佢姐,問阿龍得啦掛。
「咪八啦妳,由佢靜陣無野啦。」
又係靜…一個二個都係咁,有咩事都唔肯講,算數…
~~幾日後~~
呢幾日都無咩事發生。
阿sam同阿奈仍然係咁恩愛,經過一個禮拜之後,佢地已經進化到同居既地步啦。太恩愛,有時就連我地幾個都頂唔順。
阿龍仲係日日過佢媾女&比女媾既生活,都唔明佢,咁多年都係咁,唔悶架咩?
而我同阿鋒,大家見到都仲係尷尷尬尬咁,呢幾日少左同佢串黎串去,大家都覺得好似有d唔妥。
「喂,妳係咪鍾意左阿鋒姐?」上上下堂,阿奈無啦啦走埋黎好直接咁問我。
其實五個都係八公八婆,何況大家都關心大家,所以八黎八去呢種情況實屬正常。
「下?唔係呀。」
「咪扮野下,妳個陣都係咁問我架。」
「咁妳個陣答我唔係係妳口不對心姐,而家我真係唔係丫嘛。」
「係唔係就妳自己先知啦。」
「唔係呀…」
「咁妳同佢呢幾日搞咩姐?大家好似唔揪唔睬咁。」
「我點知姐…我都唔知搞咩…」我趴左係張檯度,鬼知做咩喎…我都想知佢呢幾日做咩唔串我,如果佢串下我都仲好呀,起碼好似以前咁,唔駛咁尷尬。
「問多妳一次,係咪鍾意佢姐?」
「都話唔係囉!」哎呀!好煩呀!問完又問,咁八做乜姐?
「哦,咁算啦,妳話唔係就唔係啦。」講完之後佢又行返埋位坐。
「傾咩姐妳地?」阿sam見到我個樣咁煩就問阿奈。
「無呀,我問佢係咪鍾意阿鋒之嘛。」
「咁佢點答妳呀?」
「咪例牌否認囉,有邊個鍾意左之後真係會認架?」
「有呀,我囉。」
「咪得你一個先會咁唔知羞囉。」阿奈笑,笑得好甜。
「係呀,我係唔知羞呀。可惜有d人就係鍾意我咁唔知羞呢。」哈,話左阿sam係溝女高手黎架啦,咁都比佢兜到黎氹阿奈。
「邊個得閒鍾意你呀?」
「而家邊個係我老婆咪邊個囉,何況係人地媾我先既。」
「…鬼得閒媾你呀!」
「哦,唔好認囉。唔知邊個係度喊晒口話鍾意我,話呷醋先架呢?」串嘴,哈哈。
「你…!無野啦!」面紅啦面紅啦!嘻!
「係啦係啦,係我媾你先啦,我最唔知羞啦,怕咩羞姐妳,傻妹。」
哈,估唔到平時火爆硬頸既阿奈會變得咁小鳥依人,更加估唔到平時大男人到極點既阿sam會咁遷就佢。
唉…如果我同阿鋒都可以咁就好啦…
睬睬睬睬睬!無啦啦我做咩會咁諗架?!痴左邊條線?!傻既!唔好亂諗啦!訓陣好過!
「好鬼無聊呀。」阿龍睇晒d漫畫,女又媾完啦,開始覺得悶。
「日日都係咁架啦。」阿鋒仲係度食緊佢既魷魚絲。
「就係日日都係咁先無聊丫嘛…」
「咁唔係有咩好做姐?」
「唔知,知就唔駛問你啦。」
「你個死仔係咪玩野呀?串呀?」阿鋒一聽出阿龍句野有骨之後就即刻講。
「邊敢。」
「喂,今晚係咪去飲呀?」阿鋒突然擰轉頭問後面既阿sam。
「係呀,煩!阻住晒我地談情!」
「阿嫂小心d,佢有花柳架。」阿鋒乘機借位入左阿sam一野,哈,笑死。
阿sam聽到梗係唔放過佢啦,拎起本書就狂拍落佢個頭度。
今晚要去飲,即係要我著個件有「露體狂」之稱既衫出黎啦…唉算啦,反正都係囉,著多一次唔怕啦。
~~夜晚~~
「快d換衫啦,仲要set頭化妝呀。」
我一早就過左阿奈屋企,橫掂一個人係屋企都係悶,倒不如早d過黎搵埋佢換衫走人。
「下?」唔駛咁大陣仗掛?又set頭又化妝!我地而家去飲咋啵,唔係做新娘喎。
「下乜姐,咁阿言結婚點都要裝扮下架啦。」
「哦…」千個萬個唔願意先死死地氣換好條裙,跟手坐左係度望住面前個堆層出不窮既化妝品,係度諗究竟要點樣先可以將呢d野撻落塊面度。
「唔識化呀?」
我點頭,仍然都係好無奈咁望住面前堆野。
「麻鬼煩,雖然我都唔係好識,不過幫下妳啦。」
超,你咪一樣唔識化,我心諗。
搞黎搞去搞左成粒鐘,終於都搞掂晒啦。
「行得未呀?」阿sam整完野第一時間就過黎接個老婆。嘿,睇情形佢地就黎變模範夫妻架啦。
「得啦,等阿ka去埋個廁所就行得啦。
「得未呀男人婆?去個廁所都去咁耐。」
「而家咪出緊黎囉!」吹吹吹,比人去埋個廁駛死咩?又唔係唔知條裙麻煩!
作者:
letsty
時間:
2008-12-7 13:49
繼續努力!
作者:
唔高清
時間:
2008-12-7 14:52
十卜十卜...xdd
作者:
tellme
時間:
2008-12-13 17:21
第一章 - 第四節 - part 2
~~酒樓~~
好鬼悶呀…d人我又唔係咁熟,阿sam又掛住同阿奈係度晒恩愛,阿龍就更加唔駛講啦,又係係度比女媾,咁多姊妹團佢仲唔乘機咩。阿鋒…同緊阿言佢地幾個兄弟係度劈酒囉…我知佢既酒量一向都好好既,但係唔知點解,見到佢係咁飲係咁飲,我竟然有d擔心佢會醉囉。望下望下,我開始係度笑,可能係佢既笑容吸引到掛,佢笑起上黎個陣真係好靚仔,唔怪得可以引死咁多女啦。
玩到差唔多尾聲…我真係悶到就黎訓著囉。雖然一直都有其他仔黎埋showoff兩句,但三唔識七我又唔知同佢講咩好。
好老實講,我最怕就係去飲,一個二個三唔識七咁,仲要坐定定睇住人地幸福,真係就算有幾多好野食都嘔返出黎啦。
「喂,阿ka!成晚都唔見妳飲酒!妳一定要飲呀!」阿言已經醉到七七八八,連行步路都企唔隱。
我唔係好識飲,不過飲 一兩 杯都應該仲頂得住既,話晒今晚係佢結婚既大喜日子,點都要比下面既。
我拎起杯酒慢慢飲。嘩,好辣呀!飲第一啖之後我就發現自己真係唔適合飲酒,飲晒成杯之後個感覺好想死囉。
「好!黎黎黎,飲多杯!」佢再係我個杯度倒酒。
好啦好啦,見係你結婚咋,如果唔係睬你都傻。
飲多杯已經唔得啦,開始有d腳浮浮頭暈暈既感覺,喉嚨仲要好似比火燒緊咁。咁鬼辣既?咩酒黎架?佢係咪拎左支辣椒油比我當酒飲呀?
「再黎!」
「下?!唔啦唔啦!再飲我醉架啦!」真係唔可以再飲落去,唯有推得就推。
「係咪咁唔比面呀?!飲多杯!」
唔係唔比面你呀大佬,而係我真係唔識飲丫嘛…再飲落去我醉硬架,到時出羞之餘仲要麻煩阿奈佢地抬我返屋企就唔好啦。
「阿言咪蝦佢啦!我幫佢飲!」阿鋒一手搶左杯酒,一手拉住阿言行去另一邊。
「你幫佢頂?好!咁飲多幾杯!」呢位言兄係呢刻真係名符其實既醉貓。
奇又奇在阿鋒幾時會咁為我著想?平時佢係咪都由得我死就死架啦。
我無數清佢地個晚到底飲左幾多杯,淨係知道佢地都貓晒。
阿sam同阿龍都仲好d,起碼都仲行到路。但係阿鋒就因為同我頂左唔知幾多杯,已經好似一堆爛泥咁,行都行唔到。
「喂,你點呀?!」我扶住佢。
大佬,你男人黎架,已經夠晒重架啦,仲要貓鬼左,我就黎支持唔住啦,可唔可以請你企返好些少呀?
「…嘔!」sh*t!呢頭未講完轉頭佢已經嘔到一地都係,我頂!
好彩酒樓附近就有的士站姐,如果唔係我同阿奈都唔知點抬佢地返去。
落車之後仲要同佢地黎一場大混戰,先捨得企得得比我地扶住黎行。
幾經辛苦,我同阿奈兩個先扶到佢地三條友返屋企。
「ka,妳搞唔搞得掂呀?」阿奈幫手扶左阿龍入屋,跟住問我。
「得啦,妳去照顧妳老公啦。」
「我等佢訓左先過黎睇龍仔,妳睇住阿鋒啦。」
「ok啦。」
阿sam簡直好似一條爛蟮咁,入到房連鞋都未除就呯一聲趴左係床度。
「喂呀,你訓好d得唔得呀?」阿奈係咁拍佢、拉佢。
「得得得,我?葑o晒,放心喎。」
「邊個醉左會話自己醉架?飲到咁大,仲要麻煩我扶你返黎。」
「得啦,我無事。」
「做咩今晚咁易醉呀?平時飲幾多你都無事架。」
「開心囉,言仔結婚,我又有個咁好既老婆。」佢攬住阿奈,「我頭先係度諗,幾時先輪到我地結婚。」把口就好正經咁講緊野,但隻手就好無規矩地係阿奈個身度遊走緊。
「做咩呀你?正經d啦。」阿奈捉住佢隻手。
「妳話做咩呢?我而家好正經架。」
「下…?」
「下咩呀妳又?成日都下既。」
「下?無野呀,訓覺囉。」阿奈比阿sam既舉動搞到唔知做咩好,係度左閃右縮,仲即刻轉身扮訓覺。
「喂,咁快訓呀?」
阿奈無出聲,好明顯係度扮訓緊啦!邊有咁快訓得著架?!當阿sam白痴咩,以為咁就可以呃到佢。
「咪扮野呀,邊有咁快訓著呀?」阿sam趴係阿奈上面。
「訓左啦,唔好嘈。」
哈哈,訓左都仲可以講到野咁勁?!你都幾西利喎!丫唔係,應該話係搞笑先岩。
「好啦好啦,唔玩妳。妳又話去睇阿龍既?」
一聽到呢句,阿奈野都無講就一支箭標左出屋企門口。梗係啦,比佢走得甩喎。
背後既阿sam望住佢既背影傻笑。世事有時就真係咁離奇,出名「一日上」既阿sam竟然會對住阿奈忍手而唔勉強佢。
或者呢個世界就真係人食人架啦,阿sam比阿奈食到之餘,阿奈又比阿sam食到實一實,哈。
歡迎光臨 UFunFun 討論區 (http://ufunfun.com/)
Powered by Discuz! 6.0.0