[東方日報]賽前分析~聖日耳門當起唔赦里~

為遷就明晚法聯盃決賽，法甲今輪大部分賽事將改於周日晚舉行，重頭戲里昂主場對巴黎聖日耳門則提前於今晚上演。兩隊近況各走極端，里昂連續兩場聯賽失分，七連霸王朝面臨崩潰，士氣插谷底，相反聖日耳門未有因足協盃出局而受影響，上場大炒對手仍具爭標決心，波童信聖日耳門今仗可不敗，捧「讓球客勝」。（周六凌晨2時30分開賽）

自從波童《東方波經》推介法甲波以，聯賽冠軍一直都係里昂囊中物，不過今季情況好唔同，踢大半季，里昂唔單止冇過去幾季霸氣，近期表現更每況愈下，目前除被榜首馬賽拋離四分，聯賽榜亦已跌落第三位，今場再輸就會畀對手聖日耳門過頭，隨時連下季歐聯都冇得玩。里昂現時最大問題係球員信心不足，好似之前主場面對實力較弱歐塞爾同摩納哥，兩場加埋只得一分，球員承受壓力下，上周對爭標勁敵波爾多完全踢唔出水準最後輸埋，全面陷入信心危機，今場就算有主場之利都冇優勢。
聖日耳門今季由過往幾年護級分子，搖身一變成為前列爭標隊伍，表現穩定值得信賴，雖然之前足協盃八強被基輔戴拿模淘汰，不過未有影響隊中士氣，上周聯賽返回主場以三比○大勝勒哈弗爾，爭標決心仍在。利古恩以前過里昂，對部分球員特性好了解，而且從兩隊今季需要兼顧聯賽及歐戰表現睇，利古恩用人上亦比對手優勝，起碼去到季尾，大家睇到馬基列尼、古利兩名老將表現依然可人，相反里昂射手賓施馬歇冬後只入得四個聯賽入球，效率大不如前，此消彼長之下，波童信聖日耳門可保不敗而回。