[東方日報]賽前分析~賀芬咸睇化大無畏~

德甲獨腳戲賀芬咸主場迎戰哈化柏林，雙方今仗都殘陣出擊，賽前大家都揚言踢進攻足球，今場1.78倍入球大可作首選。（有線足球台61周六凌晨2時30分直播）

賀芬咸近期飽受傷停同場上紀律問題困擾，近十仗未嘗一勝，聯賽排名由榜首直跌至第八位，今仗陣容繼續不整，除射手伊比斯域、守將查素爾同伊拔斯貝加長期養傷外，門將夏斯、中場卡路士伊度亞度同埋路爾斯古斯達禾都要停賽。不過黑柴自問係賀芬咸專家，除有球評家死黨係當地居民外，佢太太亦賀芬咸新主場球衣專門店任職，對該隊最新消息瞭如指掌，今仗賽前佢已經解決心魔，大家反佢底前要先考慮清楚。

賀芬咸班球員太過年輕，愈恨贏愈難贏，一旦唔順境即刻亂晒龍，上場對卡爾斯魯厄，賽前練蘭歷克話無論如何都要贏番場，結果球員愈踢愈急差輸埋。經過該仗後，蘭歷克態度轉變，話今季對成績已經唔存有任何目標，剩低比賽會拋開包袱，落力踢進攻足球娛樂球迷。中場領袖沙利荷域力過哈化多年，最終被棄用，到賀芬咸至大放異彩，今仗對住老東家必定搏盡踢身價波，可惜最新消息話佢亦有傷，令主隊勝望大減。

哈化近期演出亦明顯下滑，上仗雖然反勝不來梅止跌，但贏波只靠運氣加上對手留力盃賽，自從隊長費特列治受重創後，佢出名穩健「柏林圍牆」立即散晒，守將查特同中場盧斯頓貝加繼續養傷，射手禾路連同中場戴達都要停賽，不過佢為爭下季歐洲賽事入場券依然要寸土必爭，練費華利賽前亦話明以三分為目標，雙方對攻入球又點會少呢！