[東方日報]賽前分析~麥德林獨立係時候開齋~

南美自由盃D組兩個出線席位，聖保羅已經提早穩奪其一，呢支巴西勁旅今趟作客哥倫比亞球隊麥德林獨立，可以當遊埠，未必會全力比賽。反觀麥軍之前奉行保守策略，一直以和為貴逐分，但依家進入爭出線關鍵時刻，係時候爆發，睇好佢擊敗聖保羅，在小組賽打開勝利之門。（有線足球台61周四早上8時50分直播）
麥德林獨立可以話係今屆自由盃「奇怪兵團」，四場分組賽全部和波，包括首循環爆出小冷門，作客打和聖保羅。
其實好難怪呢支「和波專家」咁做，畢竟球隊斤有限，只要唔輸，就唔會被其他對手拋離，保持出線機會。麥德林獨立終於「守」得雲開，依家排小組第二位之餘，仲等到聖保羅提早出線，有可能今場放軟手腳，令麥德林獨立有機會可乘。
千祈唔好以為麥德林獨立淨係識守，其實陣中不乏射手，其中積克馬天尼斯就外圍賽主場對彭拿路一役，大演帽子戲法，成為淘汰呢支烏拉圭勁旅大功臣，今仗面對名牌聖保羅，佢隨時又發威。

聖保羅今場流攤絕對唔奇，之前H組利伯泰迪有辦畀大家睇，一取得出線資格，就作客輸畀秘魯體育大學，聖保羅亦好可能學利伯泰迪，做「慈善家」派分益街坊。