飲茶當然係香港人假日常去的活動之一,每到假日酒樓多數都會人頭湧湧.當然,飲茶有平有貴,下午茶時段就多數較平常時間廉宜,所以今次小弟就講下自己常去飲下午茶之酒樓,係位於大角咀奧海城之魚x城酒家.


今次要左兩個下午茶餐,當然都有附加一些點心炒河之類啦.............$58一個點心一個甜品一個鮑翅灌湯餃,睇落都幾吸引,一於影哂出來先.


先講個主角灌湯餃,入面有少少金華火腿,一小塊魚翅,入面個灌湯餃頗熱,入面有好多料如碎豬肉同埋一些菜粒,鹹味適中,而且入面的高湯因有少少金華火腿而味道帶有肉味,加上餃內菜肉都有咬口,可以俾到80分


到講下點心炒粉之類..........
1.鮮蝦貢菜餃---蝦鮮,貢菜好脆,而個餃皮都唔太厚,蝦都幾多架,食落都頗脆身,配搭不俗


2.豉油皇吊片炒河---見到唔係太多料,味算係比預期中冇咁鹹,吊片食落基本上都係切到細細條,配芽菜洋蔥味道都尚好


3.沙律蝦春卷---脆口唔太甜,蝦肉都填得可以,係略嫌沙律醬多左點



4.水晶蝦餃皇---蝦仁真係大大隻,而撈埋少少肥豬肉爽口彈牙,更好的係食落冇乜雪味,好吃好吃


最後講埋甜品,先講糖不甩軟榚,細細粒,唔太黏口,而且表面有點香口,可以咁啦..........


還有一個---蛋散,呢個真係每次去都食,食落好鬆化而且好香,再者係加埋麥芽糖,更加香口..........


埋單兩位約二百蚊,飲下午茶有如此質素,當食飽埋個午餐算不俗............

是日河馬仔十場心水選擇:

第一場:
10.分享-上場沿途四疊冇遮擋,騎師咁樣跑法真係唔輸先奇.此馬頗為細隻而且爆發力唔大,要有好形勢才有計.今次幸好抽好檔兼快放馬多,再加上係晨操狀活躍但冇轉瘦到,馬已見準可雍今次現真章

是場心水:
10.分享-6.運動健將-8.金不換-12.神機妙算

第二場:
2.中華英雄-雖然今仗排大外檔對此老馬必定害處多多,不過計落同場真正快馬接近零.此馬田草中距離又嫌對手強,跑谷草千二對手相對來說就弱得多,如能順風順水立心放頭走唔係冇勝算,係略嫌晨操偏瘦而已

是場心水:
2.中華英雄-5.快步速-6.果然勁-9.歡樂精英

第三場:
3.卓暉-雖然上場已經贏左,不過跑得多下都唔覺佢有疲態,反而晨操跳兩段仲係精神冇瘦到.此馬都係留後衝一段,對手係有轉強不過有些馬唔見有谷草經驗,今次再勝唔係冇可能

是場心水:
3.卓暉-2.再來風-5.高手-11.大喜訊

第四場:
4.神箭金剛-此馬隔沙良久才有一次好表現,狀態又在多跑多操下踱步又有回神氣.此程亦可加上滇仔選騎此馬確有爆冷機.

是場心水:
4.神箭金剛-10.即時燦爛-1.威財寶-5.威陽

第五場:
6.太平洋-上場如果唔係入直路後搵位論論盡盡下要由內疊移出外疊衝基本上可以過到飛躍之旅,睇落該場水準極高,同場跑贏之家家興旺再出可在嚴重劣勢下狂衝入位,而第四之威武雄星可再贏.老馬晨操仍然勇銳壯身,回谷草對手實際上又頗弱可望補中

是場心水:
6.太平洋-5.綠駿之威-8.歡樂滿堂-9.盈駿寶

第六場:
12.曉勝駒-雖然此馬谷草毫無根據,但此馬近四場次對手可以話同今場之對手係有一段距離,此馬近兩場用跟前戰略證明已經唔太差,現時回千二谷草看來較田草千四會較有機會,晨操快跳兩段已經出腳見爽而收身見佳下,如地合應該係有爆冷條件

是場心水:
12.曉勝駒-11.藍老虎-4.常山鳳寶-10.精英財星

第七場:
3.奇異福星-此馬雖然加分頗多不過狀態仍然同幾場冇乜分別.上場田草可以不理,大前仗在此程其實失運塞車才未能發揮.今次磅位居然較上仗輕,同場部份對手係強但大多都係老對手或者冇谷草經驗,始終今場有些馬係要蝕磅跑下呢隻馬係有得諗

是場心水:
3.奇異福星-2.大富之星-4.確叻迅-6.銀太陽

第八場:
2.熊中雄-此馬分數已好盡,但始終係同冼少最夾,要好好發揮此馬之後勁確係小點騎功都唔得,今場有回好檔加上快馬尚多,對手大多博得殘或出過毛病之下的確係可以趁機添多一場勝仗

是場心水:
2.熊中雄-1.孖寶神駒-3.威騰-9.魅力漢子

第九場:
1.星運伯爵-此馬上次久休復出實際上最後二百在緊迫下難以催策,加上該場前段甚慢,佢有咁嘅衝刺算好,今次增程明顯對此中途馬較合發揮,加上晨操泥地跳兩段明顯精神爽,希望除眼罩可令此馬更放鬆來跑,留後衛一段睇下衝到幾多

是場心水:
1.星運伯爵-2.福喜-6.金獅勇將-11.天祿

第十場:
4.皇馬-上次之第四一點都唔叻,不過算係佢本身有進步之表現,晨操仍有點急燥不過用西哥跑希望能將此馬擺前少少跑,只望今場多馬搶前而尾場較利放頭下有望一爭

是場心水:
4.皇馬-2.緣是燦爛-9.經典再現-12.飛躍之旅