Day 6 - 黑門市場 - 難波 - 道頓堀
今朝7am就醒咗，可能因為尋晚出奇地一早就瞓得着!
早餐去黑門市場海老之大榮食。係香港搵資料時同魚心一樣又係發現評價好壞參平。
係海老之大榮係食唔到海老ka!可能已經賣哂la!!我哋買咗白魚、赤貝、三文魚、大拖買壽司、海胆。當中只有海胆好味，赤貝唔新鮮之餘係完全無味道ka!日本三文魚一般都唔夠肥美，大拖羅係有根嗰隻，唔算入口即溶，我唔太鐘意。雖然唔可以話唔新鮮，但係同東京築地及北海道比就真係差咗d!
食完就沿着黑門市場幾段路行下，見到d生果好正，d桃雖然已經包實哂，但係行過都可以聞到好香甜o既桃味!可惜我哋有排都唔返酒店，又唔想"焗"住d生果，所以都無買到!
我哋第一日到達大阪返到酒店房時，有個日本電視節目介紹緊下面呢間天婦羅，影得好好食咁!至到見到個樣又真係好吸引喎!有好多唔同款可以揀。
結果就買咗原條海鰻、沙甸魚、蕃薯、薑、老板娘仲送咗魷魚同多一塊蕃薯比我哋tim!鰻魚
￥300，其他￥100。整體油咗d，因為唔係即炸，所以淋咗少少。蕃薯幾好，沙甸魚最好食，薑老公就話咸咗d!
行過一間豆漿舖，買咗杯試下。係HK上網已經見過人介紹話HK人未必接受到。見
￥60就買咗杯試下。嘩，真係不得了，'傑'到好似飲緊漿糊咁!!
雖然好有黃豆香，
但完全無甜味，texture亦頂唔住!
一路行到難波千日前，有條廚房街。見到有間類似supermarket，專俾restaurants 買材料。你估下呢d係咩野肉？
答案係鯨魚肉呀!d日本人打正科學研究旗號，其實只係想捉d鯨魚食，真可惡!
行到4點到就落咗場雨，所以唯有避走0101，1/F有間Churchill 抖一抖。叫咗杯 ice coffee 同 parfait。
見停咗雨又抖夠就再出動，點知行到道頓堀又落雨喎，唯有每人俾
￥315入去極樂商店街 (好似依家已經執咗？)。
其實裡面無嘢好行，每樣遊戲都要另外再比錢玩，我哋兩個cheap精當然唔會就範啦!
極樂商店街裡面有一間食冰o既舖頭，好大杯的，如果能夠係限時內食完就唔洗比錢。小林尊都係度食過ka!
沿着道頓堀條街一路行，見到一間賣章魚燒，但係又無檔名喎!老公話呢間就係出名
o既元祖，咁當然要信老公la！就係咁就出事la！兜章魚燒實在太難食啦!!
佢哋係用蘿蔔茸，無啡色嗰隻醬ka，粒丸d皮又淋patpat咁!跟住望下側邊d人食果兜唔同我哋ka!有木魚，有啡色醬，咁我咪四圍望下law，就見到真正o既「元祖」啦!
咁當然係掉咗手上嗰兜，跟住9秒9咁過去買嚟食啦!
行到7pm到就去咗美津の食好味燒。以前去日本都食過幾次廣島燒(自己燒嗰種)，又好玩又好食。今次嚟到大阪就諗住食下專門店的。我哋叫咗一個山芋燒(人氣No.1)同豚肉燒。唔好以為個山芋燒會好寡，個係有大大粒帶子係裡面ka!d帶子好鮮味，成個餅比較濕潤，而豚肉燒就似韓國燒烤咁，辣辣地又多蔥好惹味。
就咁又一day la!仲有12日!!!
