我係一個新手，好想分享自己既愛情故事。可以識到更多既朋友。
希望大家會支持…

我係一個性格樂觀、主動。喜歡浪漫、不切實際!
對愛情好簡單既人，只係合眼緣有FEEL，就得。
但係緣份好多時都係未到就未，話唔來就唔來。
就算你幾想擁有，緣份總是戲弄人、就戲弄人。
每當自己搵到一個鍾意人時，可惜，
你往往都唔能如願意償。總係被拒絶收場。
相反，你唔想鍾意既人就會痴埋來。
我真係好心灰意冷，打算放棄，把自己既愛情寄託予四方。
還要講句：人生也不只戀愛這一路。
滿有決心之際，但係我又放棄依一個念頭。
因為......

電話響～

我：<喂…點樣！>
阿文：<今晚出來啦，有ｄ好野比你睇！＞
我：<吓……>
阿文：<吓咩野啦…睇你都無人約啦！>
我：<無人約…大把女約我呀！>
阿文：<你有咩野女呀！有女我會唔知！唔理你呀！今晚一定要出。>
我：<是但啦…咁你搵埋阿威出來喎？>
阿文：<阿威唔得閒呀！>
我：<咁算啦…照出啦！>
阿文同阿威係我識左十幾年既兄弟，對我感情生活十分了解！
今晚既約會來得突然！有Ｄ古怪…
我約左好朗豪坊一間食泰國野既餐廳！我一入到去，阿文已經搵定位，
竟然身邊多左個女仔？

阿文：<喂…依度呀！>
我：<HELLO~>
阿文：<介紹你識…依個我女朋友Maggie>

我地就咁見左兩個鐘頭，一路食飯、一路吹水。氣氛都好開心。
當道別後，我內心好矛盾～一方面好開心係阿文拍拖、另一方面
唔開心，我仍然係單身，連自己鍾意既人、動心既人都搵唔到。
我整個人係一個悶悶不樂既心情下去搭小巴返觀塘。

當車去到牛頭角時，突然間落好大雨，我好好彩有帶雨傘。
我落車以後，想起要襟錢…就去左渣打銀行，正當我入門口既時候。
見到一個好靚、好清純既女仔。係度望住個天。於是，我昅左佢一眼。
其實唔止一眼，係好多眼…然後襟錢…但時不時都望一望個女仔。
我係度諗？好唔好問下佢要唔要＂姐＂佢呢？
但係我亦好怕，因為素未謀面，又唔識你，洗乜你咁好心。
內心真係極其爭扎。結果，我深吸一下…同自己既講：算吧啦…
然後收埋Ｄ錢後，就行出去同一個門口，但係雨勢好大，無停過。
我打開左雨傘，忍唔住鼓起左最大既勇氣同佢講。

我：<不如我"姐"埋你啦？>
她：<吓…我諗唔洗啦！＞（佢望一望天）
我：<我睇來場雨都會有排落，你咁等唔係辦法，
          我"姐"你過OK買把雨傘啦。>
她：<咁好啦…唔該你呀＞

我從來無諗過自己咁大膽呀？竟然咁有勇氣同佢講，係出自一份好心呢？自己心裡有數？沿途我都唔敢同個女仔傾計，只係低頭咁慢慢行到ＯＫ。我好耐都未試過同個女仔雨中漫步啦。行到ＯＫ門口。

她：<唔該晒你…＞
我：<唔洗…我走先啦…ＢＹＥ！>

就咁…我同佢就道別左，依一個女仔，係我第一個一見鍾情既人。
唔知再有冇機會見到佢呢？

過左好幾日，我仍然去想依一個女仔。
尤其係我行走渣打銀行時，時不時係到諗會唔會撞返佢呢？
撞返佢會唔會認得我呢？
我猛咁係度諗，只係一種胡思亂想。估唔到男人都會咁。
依單野，我只係同阿文講，完全唔敢同阿威講。
阿文份人比較感性、相反阿威係一個完成實際既人。
如果依單事件講比阿威聽，一定會比佢話我多餘，無聊。
正所謂：話不投機半句多。所以，阿文係依一件事既知情人士。
當然Maggie 都會知啦。

阿文知道我係一個唔容易動心既人，仲話我眼角太高，好難搵女朋友。
但我一向都唔認同，因為我係一個寧缺勿濫。所以咪要承受孤獨、單身既代價囉。
雖然自問樣貌唔係一名令仔。但阿爸阿媽起碼生得我唔醜。
可惜，愛情總係沒有好既結果。真係令人死心之際。
突然出現了依一個從天而降，從不相識既天使。

依一排成日都落雨，每當落雨時，我都會諗起當晚情景。
當然，點會咁容易再撞到啦。觀塘真係好大架。
理性當然係咁講，但係內心當然好想見到佢啦。
但結果失望而回。就咁過左一個月。
我對佢已經越來越模糊!亦開始記唔起佢既樣子。
或者人總係會善忘…

有一晚，突然間收到個電話。
老闆：<阿Wind哥仔，聽日八點半返工得嘛？我單野要你幫搞搞。
              我約你八點半呀!>
我：(>__<" 乜有得選擇唔得咩!) < 好…無問題，聽日見。 >

於是，就要比平日早訓左十五分鐘啦，大約係兩點鐘到啦。

第二朝早，我比平日早左成個鐘出門口，望一望個窗口。仲有陽光添。
於是我就去搭巴士。我公司係荃灣。所以，搭42c係不二之選。因為可以
有位坐、有得訓。而搭地鐵又要企、又要迫，仲要貴添。所以諗都唔洗諗。
去到巴士站，估唔到比我想像中多人喎。我唯有排隊等。
等等下車，突然間打左一個雷。風聞色變咁，死火啦。唔通會落雨。
六合彩又唔見我中，一講就立即中。我好徬徨。等車好，還是避雨好呢？
如果去避雨，一陣排返隊又無位坐。唔避又會成身濕晒。
面對進退兩難局面。真係唔知點做好。要係我人生舜間作決定之際。
突然間有一把雨傘放係我個頭頂。然後聽到一把好溫柔既聲線。

她：<今次輪到你無帶"姐"呀?>
我：<係呀!>
她：<要唔要我"姐"你去ok買"姐"呀?>

(^0^估唔到咁有緣呀! 但可惜我來不及反應。)
我：<哈哈…我諗唔洗既。>
她：(笑) <吓…你都幾好彩喎。>
我：(我遇返你好彩^^) <點解既？>
她：<因為有車囉!>
我：<係喎!>

我掛住望住佢，所以完全唔知道。見返佢，我真係個心跳得好犀利。
諗都無諗過會係一個咁既情形下見返佢。依D情景真係好似小說既情節先會出現。但係卻係偏偏發生係我身上。人就係咁，當你越想去做一件。往往未必會比到你，但係當你唔諗既時間，就會無端端發生。
佢”姐”到我上車。我地上左上層。>__<”點知~~只係得單邊位。佢同我示意坐依個位。我就坐係後後後後既一排。不過都好好，如果佢唔”姐”我。我諗連位都無得坐。
架巴士都好多人呀，今日依程車，我完全無訓過。全程都時不時望住前面坐位。可惜個位遮晒佢個人。唔緊要啦! 我都感覺佢存在係同一個空間嘛？好似講緊怪談咁呀。車既冷氣雖然好大，但係內心既興奮真係令到我全身感到溫暖。但架車好快就去到荃灣。我要落車返工，但知道佢未落車。我正打算同佢講一聲：BYE BYE，但係佢訓著左。所以我唯有就輕輕的我走了啦。而落留梯時，我仲回頭一望佢添。但係佢仲訓緊。不過依然都係咁靚、咁清純。我用眼神同佢講左聲：BYE!BYE!

落左車既時候，已經停左雨。我好快咁步行返到公司度。
放低個D野，就步行入經理房。

我：<早晨!>
老闆：<早晨! 唔好意思喎，要你咁早返來？你唔會唔開心呀。>
我：(我多謝你都來唔切啦。依句真心架。) <唔會，有咩野要我做呀!>
老闆：<你幫我搵依LOG PO 比我，個客趕住要。>
我：<無問題？>

由於我心情真係好靚。所以，平時叫我做乜我都唔願做，依一日，的確比平時多左好多動力去做野。我做做下大約十點半，突然阿文打來。

我：<點呀! 兄弟…>
阿文：<仲乜心情咁好呀!>
我：<講你都唔信呀! 我撞返佢呀!>
阿文：<唔明?>
我：<我撞返我女神呀!>
阿文：<吓…唔係掛。點撞到呀!>

講晒比阿文聽後，佢都難以致信。不過世界咁大真係無奇不有。有D野真係連自己都唔再相信。

我：<我真係無鬼用呀! 連佢乜名都唔知。>
阿文：<算啦! 佢肯主動”姐”你已經執到啦。>
我：<係啫。>
阿文：<你依家撞返佢，不如日日都會係依個時間等佢出現啦，

咁咪日日撞到佢囉。起碼佢家下都識你啦。>
我：<^^我都咁諗。>
阿文：<你快D加把勁啦。阿威琴晚同我講。佢都拍緊拖啦。>
我：<真係架。如果我都拍埋拖。一於我地三兄弟一齊去個旅行。>
阿文：<一於咁話。>
我：<唔得。阿威咁神秘，今晚放工打個電話比佢先。>

我放左工之後，就打比左比阿威八下佢既新戀情。

阿威：<點呀？死仔!>
我：<拍拖喎。叻仔啦!>
阿威：<洗乜講，好似你咁呀!>
我：< >_<” !! 唔洗入我位呀？>
阿威：<你呢？學人玩咩野？渣打情緣、定OK情緣呀?>
我：<哈哈哈…真係只有死人先守唔到秘密架。>
阿威：<無所謂! 鍾意人咪溝囉。>
我：<溝？點溝呀?我連個名都唔知呀？>
阿威：<傻仔! 依D唔係要我教呀?自己用下個腦啦?>
我：<吓…哦!>
阿威：<我係你，聽日一早去巴士站等佢。然後就直情行埋同佢講：我

好鍾意你。得就得，唔得就算。>

真係唔知比咩野反應阿威好。不過佢講得好岩，我真係好鍾意依個佢。

樓主堅呀

到左第二日，我又一早去等。可惜唔見佢既縱影。如事者，我係返工日都係KEEP住咁做，Love is Strong。依一個月，我都好早返工，我覺得愛情係一個好大既原動力。但係，我足足一個月都係咁做，都無係見唔到佢。或者我真係希望越大、失望越大啦。我對佢亦開始越來越模糊!
亦開始心灰意冷。

大約一個月後，有一日我下午放假。因為我準備去同幾個朋友到台灣，而我係搞手，所以就約埋D三位無聊朋友出來傾下之餘、順便打機，當時熱打緊Monster Hunter 2，而依班朋友又住係青衣住。所以我地相約左三點度係青衣城等，見仲有時間，於是就去一去銀行一趟。順便換台幣。而去到銀行時，真係好多人。於是我就諗都唔諗就攞部機出來打。KP 打得好著迷。到我既時間都唔知。直至有個阿嬸拍我。指我去3號窗。我先有反應咁行到埋去，之後就呆左，然後又心跳加速。因為我竟然遇返佢。

她：<依咁岩既？先生，有咩野可以幫到你呀？>
我：(微笑) <係喎，你係度做架？(有點爛GAG添上^^) 麻煩你幫我換12000 蚊台幣啦？>
她：<好呀!先生有冇考慮用申請信用CARD 呀?>
(我諗都唔洗諗呀？)
我：<好呀! 有咩野優惠呀？>
她：<我地免年費架？如果你碌夠3000蚊，可以有部IPOD 架。>
我：<咁好啦，我都想申請多張信用咭。>
她：<你去台灣呀？>
我：<係呀! >
她：<台北？>
我：<係呀!>
她：<你買左旅行保險未呀？>
我：<未呀？你有冇好介紹？>
她：<你可以係我地度買，每日都係38蚊!>
我：(>_<” 人地話追女仔係要落本架。依句話係好真實!) <好呀! 唔該你

幫我搞埋。>
她：<多謝你先!>
我：<係呢？點解依一排唔見你搭車既？>
她：<依排我公司要我早少少返來打點下先。不過來緊我可以

唔洗咁早。>
我：<哦……唔怪得啦! 係喎？你叫咩野名呀？>
她：<你可以叫我:Christine!>
我：<我叫阿Wind!>
她：<你要既野搞掂晒啦。仲有冇其他野可以幫到你？>
我：<無啦!>
她：(微笑) <去旅行記得買手信喎？>
我：<好呀!>

真係好開心呀!!估唔到我地就咁相遇，但係我仍然都唔敢開口問佢攞電話，不過咁。我覺得上天都對我好好，以為忘記佢之際。突然間佢又出現返。唔知今次我會唔會結束單身既日子呢？

過左一陣我就打比阿文。

阿文：<點樣？>
我：<阿文! 估都估到呀? 個天對我真係好呀!>
阿文：<點好呀？中左六合彩呀？益下d兄弟好喎!>
我：<係我依家既處景，真係無乜分別。因為我見返女神呀!>
阿文：<吓？真架!>
我：<講比人聽都無人信呀!>
阿文：<你講我咪信囉？>
我：<妖…你份人呀！可唔可以比D反應我好喎？>
阿文：<嘩……天作之合。簡真係一出電視劇咁呀?>
我：>_<” <妖…仆你個街啦!>
阿文：<哈哈哈…玩下啫! 點撞到呀?>

我講晒成件事比阿文聽，由於我太留心講啦，仲好唔小心添…

我：<哦~SORRY!>
阿文：<仲乜SORRY 呀!>
我：<我唔小心踩到人!>

其實我係唔小心入錯左女厠，可惜只係見到個師奶!!

阿文：<今晚有冇野做呀？>
我：<同班死仔傾完行程、跟住打完機就散。>
阿文：<不如約埋阿威出來啦相討一下得美人一事呢、而你後日又飛啦，
　　　順便當餞行？>
我：<好呀!>

唔知點解？人心情實在太好，做乜都好順暢，打機殺龍無難道，平時D比龍撞兩撞就死!依一日，我簡直係殺龍巴斯。夜晚就約左阿文同阿威係沙田。我地有個習慣，如果臨去旅行前，就會約埋出來食飯、當餞行。通常地點都係沙田，好多時都因為二對一既關係，所以要就佢地。而有時候! 將自己既煩惱、心事同Ｄ兄弟分享，的確係可以後此分擔。但係亦要付上沉重既代價。

支持一下先

阿威：<Christine…銀行妹。行家來喎!!>
阿文：<世界真係無奇不有，唔通我今年我地三兄弟行桃花。>
阿威：<桃條毛咩？溝女最忌既係無膽？>
阿文：<威哥! 好似好有Ｄ心得喎。>
我：<妖…你有Q溝過女咩？Fanny 溝你渣嘛!>
阿文：<說話就唔係咁講啦!有本錢自然D女就係痴埋來。>
阿威：<阿文! 你就唔好玩D兄弟。你大佬阿Wind 哥呀! 廿幾歲人

玩緣份喎! 現實D好~真係唔理好醜，最緊要就手。>
阿文：<咁我地條女又唔係太醜既!>
我：>_<”” <得啦! 事情都去到依個地步，係我唔岩。對唔住兩位大佬。

快D比條橋來？>
阿文：<點解你今日唔佢攞電話呀？>
我：<問乜鬼啫! 見過一兩次面咁喉琴。>
阿威：<男人對女人喉琴係天公地道架。我係你行埋去，比就比、唔比
就算？瀟灑D 好!>
我：<威哥，我很認同你既高見。隔離枱有三個女仔幾索下。不如你行

埋佢攞佢電話呀?>
阿威：<哈哈…我唔可以做出對唔住女朋友既事…SORRY!!!>
阿文&我：<小。。。＞
阿威：<聽我講…去完旅行，就乘機攞手信比佢。>
阿文：<岩…最緊要問佢攞電話或者MSN。一定要同佢接觸。>
我：<其實我攞去銀行度，佢會唔會唔方便架？影響到佢架。>
阿威：<怕乜野喎…你係佢間銀行出糧嘛。你就佢既客啦。邊個敢話佢
呀！>

阿文同阿威既說話真係有幾返道理，起碼都要接觸到佢先得架啦。我只係一味係個腦裡面咁諗。有鬼用咩！但係佢地都講得岩，Christine既然都同我講左叫我送手信。我咪可以借手信既機會同佢接近距離！

過左幾日，我同三位朋友飛左過台北。其中一個晚晚既重點活動，就係去Disco。四條仔梗係去識女仔啦。但顯然我係最唔起勁個個啦。因為我思鄉囉！哈～其實我真係好掛住Christine就真。雖然台北既女仔好既主動又熱情。我個三位朋友當然唔會放過依Ｄ咁既機會啦。但係認真Ｄ講，台北既女仔真係唔錯既。可惜…我好似比人落左降頭咁。只係諗起另一個人。或者咁講啦，如果我見唔返佢，可能真係會好享受同異地既女仔相處既。

我地只係去左三日兩夜。返香港時仲係要坐六點機。所以，唔能夠落機就立即係去搵Christine。當一踏入香港機場後，我第一時間深呼吸左一啖氣。唔知點解香港既空氣特別唔同，或者咁講。香港勝在有Christine啦。我真係好期待第二日去青衣城搵Christine。

到左第二日，大約十二點幾到啦！我起身沖涼、洗頭。然後帶埋手信出門口。手信係乜？其實係少少野食同埋一條手繩。我食完野後就入左青衣搵佢。希望今次可以同佢真正認識啦，雖然天公不做美，但係難唔到我既。自從同Christine相識後，唔知點解？以前真係好討厭落雨天。依家總係對落雨天產生左一份額外既感情。我諗每逢落雨天，令我更加去想起Christine。
今日依程車特別耐咁。可能我好心急見佢啦。但係我又好緊張喎，時不時深呼吸！我諗依個反應都係正常既。因為我真係好想立即見到佢嘛！我緊張到忍唔住打比阿文。但係阿文太多野做所唔得閒同我傾。
我唯有繼續係依一個時間，一個人獨自緊張啦。

去到青衣城，我去到佢銀行門口。但係左望右望，見唔到佢，於是，我忍唔住向銀行職員問下啦？我想起阿威既一句話：我係客嘛。

我：<唔好意思？>
銀行職員：<請問有咩野可以幫到你？>
我：<我想搵你地個位同事Christine！>
銀行職員：<Christine! Sorry！我都係第一日返工！我幫你問一問其他同事。>

有一個我估佢年資比較耐既職員，仲話左佢兩句，我遠處聽到Exchange一詞。

資深職員：<Christine佢琴日掉左上創紀之城喎。有咩野可以幫到？>

唔通話比人聽我溝女咩？我唯有同佢講張信用咭批左未囉！順便問一問定期存款囉。我真係好灰，以為可以邁向一大步之際。又打回原形。
Christine 佢真係天上既女神咁，而我只係地上既凡人。佢係你見到時只係顯一顯靈。然後就會途去無蹤。緣份又再一次戲弄我啦。

依一刻，我好想立即打比阿威，不過佢多數都要見客。因為佢係銀行到做投資部到做，一得閒就要打比Ｄ客。所以，我無打比阿威。只係同阿文講。

阿文：＜點呀！送左比人未呀！＞
我：＜>_<～我又衰左啦！＞
阿文：＜吓～佢唔要份禮物呀？＞
我：＜唔係！＞
阿文：＜咁係Ｄ乜野呀？＞
我：＜佢掉左去第二度呀！＞
阿文：＜掉左！咁你咪攞埋去比佢囉！＞
我：＜吓…點攞呀！佢同阿威都係一樣坐寫字樓架？＞
阿文：＜寫字樓、唔鋪呀！唔係咁黑仔呀！＞
我：＜唔通個天都唔鍾意我！＞
阿文：＜唔緊要啦！我諗唔係你諗到咁灰既。＞
我：＜吓…唉…算啦！＞

我隻身走到返觀塘。架42C巴士當經過創紀之城時！真係好有衝動落車。但係當然無啦。無啦啦咁上去，好似好怪。其實我真係無咁既勇氣上去見佢就真。唯有係個窗口度目送座大廈。有時諗諗下，自己真係好無鬼用。無Ｄ男子氣慨。但其實我諗深Ｄ。同Christine 只係幾面之緣。一個陌生男子上人地Office度真係好怪。仲要走去送手信比人。做人真係現實ｄ好。唔通落完雨之後，走去遮一遮人就可以發展出愛情故事咩？你估愛情小說橋段呀！所以，當返到屋企後，我就將原先送比Christine既小食食晒。然後仲諗住掉埋打算送比佢既手繩。而當自己打開左垃圾洞既蓋既時候。諗諗下又好唔捨得。係唔捨得既係Christine。所以，我最終放棄掉左條手繩。仲將佢放左係書枱上。等我晚晚上網時，都可以懷念一下依一段回憶。大約七點半…收到阿文電話。

我：＜喂…＞
阿文：＜大哥…好Ｄ未呀？＞
我：＜其實我無野喎？咁大個人，仲係停留係依Ｄ虛幻情感咩！＞
（講係咁講啫，真係好鬼失望！）
阿文：＜都幾識得自我安慰喎。但係你既經歷真係好特別喎！唔係話忘
　　　　記就忘記到。＞
（=_=””！真係想講粗口， #Q@%#%#!洗唔洗咁應，當然我都會死撐！）
我：＜係就係！你地講得岩。做人真係要面對現實！依個世界點會有咁
　　　順攤既事。＞
阿文：＜等等先…Maggie 有事搵你。＞
Maggie:＜阿Wind！你單野真係好正呀！不過難左少少。放心喎！世事
　　　　　無難事、只怕人心人呀！＞
我：＜算啦…阿嫂…多謝你既鼓勵啦！不如你介紹Ｄ姊妹我識仲好過啦
　　　啦！＞
（通常Ｄ人唔介紹比你，多數都係用依一個理由。）
Maggie：＜我Ｄ姊妹唔岩你架！算啦。等等先，阿文搵你。＞
阿文：＜星期六晚有冇野做？＞
我：＜無呀！仲乜呀！你唔洗陪女咩？＞
阿文：＜唔止係我…連阿威都唔洗陪。HeHe~＞
我：＜唔怪得…好啦…又係沙田呀？＞
阿文：＜梗係啦…＞
到左星期六，我地三兄弟照舊出來，食完飯後，我地通常都會去７仔到買下野飲。然後就係城門河邊吹吹風、同埋吹吹水。

阿威：＜睇來你真係無乜野喎！果然生命力強。經得起風雨呀！＞
我：＜算啦！成世人都不切實際！＞
阿威：＜痴線…你無野呀！愛情就係從不切實際下開始架啦。＞
阿文：＜嘩…我無聽錯呀嘛？竟然出自你把口？＞
我：＜係喎！你鬼上身呀？＞
阿威：＜如果當日Fanny唔係諗住同我一齊？就唔會打動到我啦！佢
　　　　今日就唔會願望成真啦！＞
我：＜妖…你兜咁大個圈讚自己呀！＞
阿文：＜今次我好Buy威哥仔喎…因為我都係差唔多咁！＞
阿威：＜阿文…Give Me Five…. 哈。＞
阿文：＜YEAH!!>
我：＜得得得…兩位大佬。聽住啦…我依家有事宣佈呀！＞
阿威＆阿文：＜吓…＞
我：＜我要忘記Christine ！既然無可能發生既事，不如早Ｄ抽離仲好
　　　過啦。＞
阿威：＜聽住先！＞
阿文：＜同意！＞

其實我都知自己自欺欺人，或者咁講啦。我怕左希望越大、失望越大啦。雖然佢知道我係邊個？而我亦知道佢係邊度返工！咁代表Ｄ乜呢？襯住自己踩得唔係深既時候。就早Ｄ放手仲好過啦。

依件事好快過左兩個多月啦。我並唔係咁切底忘記到Christine。因為我每次經過觀塘時，一定會途經ＯＫ同渣打銀行，所以唔多唔少會有觸景傷情。係十一月份，依一日，我約埋阿文、阿威同埋佢地女朋友再加埋其他朋友一齊去南丫島玩。我地約左九點鐘要到港外線碼頭。於是我就係八點鐘去到101觀塘巴士總站踏去車。一上車我通常我會坐係樓上座位左邊頭二行窗口位。依個係我既習慣！架車就來開之際，我見到有個女仔係遠處走來追巴士。我仲快眼望以為係Christine，但無理由呀！Christine 係長直髮。但係依個女仔都係，不過電左頭髮喎。當越走越近既時候！我個心跳左出來。因為我無睇錯。佢的確係Christine 。我同佢又第四次相遇。今次我真係唔可以再一次向現實低頭。而係向自己感覺低頭。結果佢上到架巴士。我就好期待快Ｄ上來，可惜等左約三分鐘，巴士都轉左個彎，仍然都未見佢上來。於是我就行落下面Ｏ個一層搵佢！噢……唔怪得啦！原來……

原來……佢八達通有無晒錢，我聽到佢同司機講話只係得張一百蚊。而司機既態度唔係咁好。仲叫佢企埋一邊。唔好阻住磈鏡。我當然好主動咁行埋去啦。

我：<司機，唔洗咁惡既!人地都唔想。等我幫你比啦。>
Christine：^_^ <唔該晒你呀!>
我：<算D乜野呀。>

我有D想問個司機可唔可以找錢，因為我放左十蚊入去。但係有女仔係度我梗係唔可以咁失禮啦。唔知點解？我同佢既見面，總係大多數係好徬徨無助既時間之下。就會出一出現。而我同佢都會幫一幫對方。今次見返佢，我真係有少少做左英雄既感覺。或者，可能我已經成為佢心目中既英雄呢？我同佢一齊上左樓上坐。今次架車唔會只係得單邊位啦
。

我：<依…你仲乜咁早既?>
Christine：<唔好提啦…今日要去promo Credit Card，仲要去到中
環。你呢？咁早既？>
我：<約左朋友去南丫島玩。>
Christine：<你就好啦! 我都好想放假去玩呀。>
我：<我間唔中都會同D朋友去離島玩架，你唔介意下次叫埋你囉。>
Christine：<好呀…我無乜所謂。>
(當聽完佢咁講，我真係好開心^^)
我：<依…你住邊架？>
Christine：<藍田匯景花園!>
我：<咁點解唔搭地鐵或者603既？>
Christine：<我阿姐叫我早少少出門口去開源道間分行攞少少野比佢

喎。>
我：<唔怪得。>
Christine：<我又大頭蝦，八達通無錢又唔記得左，身上又無散紙。得

張五百同一百蚊。好彩遇到你渣。>
我：<算D乜啦! 我同你都幾有緣喎!>
(其實有少少肉赤，無理由益九巴。我都係一個算係幾孤寒既人。^^>
Christine :<係囉…觀塘都好大下。仲返返下工都撞到。>
我：<哈哈，我都估唔到呀! 依……你電左頭髮喎？>
Christine：<係呀! 係唔係唔好睇呀？>
我：<梗係唔係啦，好好睇呀! 仲好襯你添。>
Christine：^_^ (佢有少少面紅^^)
我：<我返到來香港時，真係有買過手信心你架。但係你轉左Office呀!>
Christine：<係呀!乜我無同你講埋咩？我講左話我遲D咪唔洗咁早返工

囉。>
(=___=””” 點會知道原來係依個意思!當然我好有風度。)

我：<哈哈哈…原來係咁既意思呀!我以為你唔洗咁早返工添。點解會

掉既。>
Christine：<我個職位係咁，成日轉DEPT。我係個半個月會轉去投

資部呀!>
我：<吓…咁快會知。>
Christine：<參唔多啦…你做咩架？>
我：<我做物流架。>
Christine：<做左好耐架。>
我：<係呀! 今年岩岩十年。>
Christine：<嘩…你咪好大個。個樣唔似喎。>
我：<我十八歲就入行架啦。所以讀書唔多。>
Christine：<吓…有乜所謂呀!讀到書又好，讀唔到書都好，最緊要心地

善良。我覺得你係一個好人。>

(我有少少唔自然，其實係飄飄然就真)
我：<我又唔覺喎。星期六我從來唔買旗架喎。>
Christine：<哈哈…咁都唔代表d唔係好人呀! 記得第一次見同你見面

時，其實我真係好無助同埋徬徨架。我當時入去渣打襟

錢。一出來就係好大雨。真係知點算。只係見到D人擔住

把”姐”，走來走去。我等左成十五分鐘都D雨都無細過呀!

我諗住打比屋企人叫佢來接我架。點知你肯遮埋我喎! 如

果你唔好一個好人，又點會咁做呢？>

當聽到Christine講返當晚情景，我內心特別有一種味道! 係咩野味道？當然係甜啦。我mei mei咀係度笑。只係做過一件舉手之勞既事。能夠成為一份咁美好既回憶。

我：<你唔好咁講我!我會怕醜架。^O^>
Christine：<哈哈哈…做得出怕咩認喎! Anyway 真係好多謝你。>
我：<係喎! 你係銀行做左好耐呀!>
Christine：<唔係呀! 做左年半啦!>
我：<你岩岩畢業就入去做？>
Christine：<嗯…>
我：<你係大學時讀邊一科？>
Christine：<我係CU 度讀Quantitative Finance>
我：<吓…咁犀利呀!>
Christine：<又幾呀! 香港讀大學咪HEA住咁讀。>

其實我唔知係咩來？只係聽到CU兩個字咪覺得犀利囉。
唔知點解我同佢傾計好似識左好耐咁。或者我地既相識係大家落緊難既時間，突然幫左大家一把。依D算唔算叫做患難見真情。所以我好大膽問左一個問題。^^

我：<雖然係啫。起碼都入度U啦。仲係CU喎。係喎？你份工忙唔忙

呀？>
Christine：<唔定喎…不過乜都要做囉。依家我咪得閒囉。>
我：<咁你今日返工，你男朋友唔炸你型咩？>
Christine：<吓……男朋友! 依家我無拍拖啦! 出來做野圈子細左，好難

搵度好男人。家下D好男人絶晒種架啦。>
我：<又唔好灰! 世事無絶對既。>
Christine：<你唔明架啦。>
我：<唔拍拖都可以搵D朋友出來玩架。好似我咁架。>
Christine：<自從出來做左野之後，D好朋友又拍晒拖，真係好難去約

人出來。你都知女仔成日都係會想人陪。 : ( >
我：<如果你唔介意既話，悶可以搵我架! ^^ >
Christine：<好呀! 我好多時都好悶。>
我：<我都係架。^^ >

就咁我就同佢交換左電話。今次既相遇來得自然同巧合! 或者，我接二咁係最需要既時間出現，的確能夠得到佢一份既信任。我同佢傾到中環匯豐銀行個站。就一齊落左車。然後就道別啦。今次道別我無唔捨得既感覺!因為，我相信可以仲有見面既機會。總算誇出相識既第一步。世事就係咁架啦，以為自己失望而回、忘記佢之際。偏偏天降返個女神比我。我對佢既感覺又返返晒來。我一路行去港外線碼頭，就SEND 左一個SMS 比佢：<估唔到咁都撞得返!Anyway~好開心識到你依個朋友。> 唔夠一陣，就收到佢既回覆：<講樣野你聽啦？我其實唔記得你叫咩野名。不過我會記住架啦^^!!> 睇完，我真係有一種會心微笑呀! 佢特登記住我個名呀! 唔知點解？真愛真係好簡單，只要對方有做D野關於你自己，你都會好開心架。^^ 依一D就係愛情既吸引力! 我腦海中不停充滿左好多不切實際既幻想。只係不停諗起佢個人，但又唔具體喎。成個人好似有精神病咁，成成日係到笑。唔知道中環D賓賓見到我。會唔會覺得香港既男仔係傻既呢？唔緊要啦。佢地點睇我真係一D都唔重要。最重要係Christine依一刻充滿係我個腦海入面。無人能夠侵占我依一刻既幻想! 行左一陣，突然間有人拍我。

嘉祺：<喂~>
我：<依…嘉祺咁岩既。去邊呀!>
嘉祺：<約左你囉~>
我：<你又同我去南丫島呀! 無諗過你會去喎。>
嘉祺：<忙都要透下氣架啦。>

嘉祺係阿威既大學同學，阿威係24歲仔就已經係去完英國完成左碩士學位返來。任職銀行投資部。不過唔係大行。相反，嘉祺由於係一個極聰明能幹既人。佢讀完書就入左一間全港最有名既銀行。三年後就已經係銀行投資部入面話到事。佢既事我都係從阿威口中得知。嘉祺亦係一個好低調既人。從來都唔會誇耀自己既才幹。所以同佢相處時，雖然自己既成就好低。但係亦唔會覺得被人睇唔起。見到佢出現，我真係感到突然! 比佢打斷左我對Christine 既幻想添。^^ Christine…. 你行下街先啦。我一陣搵返你呀! 哈哈哈…真係好傻呀!

quite good ar

我好耐都未試過咁開心啦。由於有其他人係度既關係，當我見到阿威、阿文時，並無同佢地講再度重遇Christine。但我點會暪得過佢地啦。
不過佢地可能人多，所以無來質問我。我地行到約五點鐘就出來! 然後就去左佐敦食埋飯，大約食到約未到八點半度，就散啦。我搭小巴返觀塘。收到由Christine打來既電話。

我：<喂…>
Christine：<Wind 呀!你知唔知邊度我係邊個呀?>
我：<梗係知啦! 做咩野？>
Christine ：<無乜特別! 你係街呀？>
我：<係呀~>
Christine：<咁無野啦  >
我：<仲咩野呀？講來聽下啦。>
Christine：<我忽然間好想去觀塘度食糖水。你都唔得閒，下次先啦。>
我：<唓! 我家下搭車返緊觀塘呀!>
Christine：<但係!我仲係銅鑼灣喎。你怕唔怕夜呀?>
我：<傻啦…點會怕呢？你到觀塘時打比我啦。>
Christine：<好啦…一陣見啦^^!>

當同佢講完電話後，死喇…我係唔係發緊夢呀？我自己都有點難以置信。我搭緊車既時候，仲係度諗緊點開口約佢出來。本來由早上充滿著滿心既希望，突然間又開始充滿著忐忑不安既心情。情緒化有時唔係女人既專利。男人有時係唔清楚自己點做時。一樣會係咁。不過，Christine 既電話後，我就已經一掃擔憂既感受啦! 因為，我同Christine即將會有第一次既約會。

去到觀塘，我第一時間就左去APM。去APM 做乜？買禮物送比人呢?梗係唔係啦。我只係想去一去厠所啫。第一當然係放水先啦。第二只係照一照鏡。睇下自己整唔整齊。不過個頭髮有少少亂。好彩自己去南丫島時特登帶多件衫去換。如果唔係第一次見面就比到唔好印象人啦。世事就係咁巧洽架啦。所以人地話，機會係突然其來，你一定要做足充足既準備去迎接。唔知我算唔算合格呢？但係照照下鏡時，內心既自卑感突然間出左來。我覺得襯佢唔起。佢既樣，一行出街就一定會大把人望。不肥不瘦既身型。簡直係好多男士既必選。我呢？瘦身材，成個道友咁!
正係外表真係可以吸引度人既，不過係差人。性格又粗魯、為人孤寒。
時不時都用粗口孝敬D熟人。我兩位好兄弟受唔少。一個又無學歷、又能力，都唔緊要，最緊要係財力。真係諗諗下個人都DOWN DOWN 地咁。如果，有一個神仙係個厠所到出現既話。比三個願望我。唔係係四個先岩…我會選擇：學歷、能力、財力。再加埋Christine 啦。算啦…現實D好。依個時候! 電話就響起。係Christine打來。

我：<你到左啦。>
Christine：<係呀! 你係邊呀!>
我：<APM 呀! >
Christine：<依…實在太好啦。我仲想起HXO 到買野。>
我：<咁呀! 我係門口等你啦。>
Christine：<好呀! ^^>

我係食市個曾搭扶手電梯落去。當然好緊張啦。落到HXO 個一層時，我遠處已經見到佢。可惜佢仲未見到我。我就係買牛仔褲鋪頭到企係度等佢行埋來。佢每行一步、我心就會跳一下。佢越來越近、越來越我啦。我真係緊張到暈呀。個心跳左出來咁。我講得好似好誇張咁，其實我覺得一D都唔誇張! 當你對一個人有感覺時，尤其係處身係單方面時，依種感覺就好真實架啦。尤其係我依D情景添。由一種無望變為重燃希望! 同一日內，能夠遇返佢，同一日仲同佢單獨見面。依一刻既感受真係非筆墨可以形容! 佢見到我啦，仲對住我笑一笑，面上係個小酒”粒”。不過唔係成日會出現。只係某一個表情或者笑容下先見到。

Christine：<唔好意思呀! 咁夜叫你出來，仲要你等。>
我：<吓……我平時先係岩岩醒渣。>
Christine ：<HEHE…我發覺你都好鍾意吹水喎。>
我：<吹水太過容易。我唔會吹架。我平時吹開牛架。>
Christine：<依…好爛呀!我要去HXO。行囉…>


其實我唔知咩野叫爛GAG。直至依件事後我第二日問D同事先知咩野來？我去到HXO 門口。就企左係門口等佢。因為我唔知咁! 我真係唔係太多拍拖經驗。我見佢同佢SALES 講野。問得好詳細。而佢亦好留心聽SALES 講解。我係遠處望緊佢。好似發緊夢咁。可能到今日我都仲未接受到依個事實啦。佢買完野行出來。

Christine：<你好悶呀？>
我：(令令頭> <唔係呀! 不過我好少同女仔單獨去街。>
Chirsitne：<扮野啦…香港男仔點會咁架。>
我：<我無扮野架。我除左同我D兄弟出來。根本就唔會出街。>
Christine：<哈哈…得啦。解釋既係掩飾呀!>
我：=__=”” <我諗…我依D叫唔識呀! 唔識點答你呀!>
Christine：<HEHE……你又來搞GAG 啦。>
我：<係喎…想食去邊度食糖水呀!>
Christine：<我想食D凍D…不如我地去許X山囉。>
我：<好呀!>