貓貓要瘦身, 肥貓減肥法
近幾年香港女性被纖體熱潮轟炸，大膽講10個女性應該有9個正在瘦身或有瘦身衝動及打算，到現在瘦身熱將進入另一個境界──同貓狗一齊減肥。當今潮流大勢誓必戒絕用「肥頭得意」形容貓狗，取以代之係「追求曲線」、「玲瓏浮凸」等纖體口號。「體態好嬌少、纖纖的腰多麼嫩滑、身軀嬌俏……」，諗起當年羅文〈波斯貓〉歌詞，似乎會成為今後人、貓一齊瘦身主題歌。
8成貓狗超磅
大家都無意識到貓肥令個問題，因為佢又唔識對食物拒抗，而且貓又成身毛，就算佢肥都有錯覺係毛密，但貓同人一樣，肥胖亦對健康有極負面影響，肥人後遺症如心臟病、呼吸困難、糖尿病及關節炎，肥貓亦一樣會患上。英國幾年就面對嚴重寵物過肥問題，估計當中有8成貓狗過胖，獸醫診治病例中，有二成多係跟肥相關疾病，如心臟病、呼吸困難等。寵物主人為寵物解決肥胖相關問題，每次要花費150至200英磅，為愛貓健康及主人荷包想，香港愛護動物協會今年正式開設「體重監控療程」幫貓減肥，簡單講就係經獸醫診斷貓狗肥胖程度，透過指定食糧及定時定糧飲食去減磅。不過除飲食習慣及居住環境，賀爾蒙失調等病亦係引致寵物肥胖原因，所以想清楚你寵物如果偏肥，都係學大妹去驗一驗身穩陣
