尋日老婆牛一，夜晚去咗一間由一對好有熱誠嘅情侶主理喺中環嘅法國餐私房菜度慶祝，水準相當一流，女主人 Kimmy 仲相當好客，招呼又係一流，兩公婆食到lumlum脷，賓至如歸！
Post D 相嚟大家分享吓！！
海鮮係北極螺+唔知乜鬼嘢蝦，北極螺彈牙鮮甜，食咗一半先記得影相
麵包都係自家製，外脆内軟
頭盤A係鲜帶子甘筍蓉沙律
頭盤B自家製磨菇湯
頭盤C煎鵝肝配無花果汁，入口即化，無花果清甜
主菜A，我要安格斯牛扒，肉汁豐富，肉味濃郁
主菜B，老婆要法國山鷄，我對穌皮做法有少少保留，但老婆話正
甜品A士多啤梨乳酪+植物根，幫助消化
甜品B我至愛熱朱古力餅+雪糕，回味無窮
甜品C熱焦糖燉蛋，法國出名甜品
主厨雖然係無乜名氣嘅年青小伙子，但對用料相當堅持，有一份藝術家嘅執着，呢類人做出嚟嘅菜式一定唔會差得去邊！信我！！
環境氣氛當然無大酒店咁富麗堂皇，但勝在自在唔拘謹！由於位處大厦頂樓，仲有個露台可以吹吹風，相當寫意！！
價錢仲相當合理！$380/位，海鮮、酒、水另計，有部份主菜要加多$50，個人覺得非常超值！！
如果100分係滿分，我俾98分！2分係扣起Kimmy大頭蝦寫錯我老婆個名！！
暫時只做晚市，星期日休息，要訂枱！
想知電話地址可PM我！！
