這日工友飯聚於
牛頭角下村金利來﹗
快要清拆的牛頭角下村，相信在這一頭工作已久的工友們都有0的
唔捨得﹗
10:00pm先來到，今晚又唔算多人喎﹗
一行十四人訂左枱一來到已經可以入座﹗
先來
豉椒鵝腸，我就一向都唔食架喇，不過有工友說要添食，食完再來多碟，可以相信呢碟野都幾靠得住﹗
右面的是
黃金脆肉瓜，炒起脆肉瓜再加鹹蛋王炒，惹味濃香中有清甜﹗好食﹗
左面的是
粟米魚肚羹，為大肚婆而設，充滿蛋香不過我覺得淡左少少﹗
呢碟
豉椒蟶子我一拍完照食左一隻之後已經俾人搶哂，新鮮彈牙夠入味﹗好食﹗
反而另外有叫炒蜆殼多過肉幾倍，搵極都搵唔到肉之下放棄了﹗
辣酒花螺個汁唔多覺得辣，螺肉有嚼勁卻未算鮮甜﹗
呢個雞係呢度名菜，叫做
飄香雞，雞面先鋪上海蜇，再用大量豉油辣椒香蔥作汁﹗
白切雞本身我一向都麻麻，小試一口之後發現雞肉相當嫩滑又肥美多肉，蘸0的醬汁食更覺微辣而惹味，工友個個搶住食，食完一隻之後再添多半隻﹗
椒鹽雙扒及魷魚，呢度0的炸粉用得比較厚身，椒鹽味道適中，魷魚彈牙惹味﹗
呢個肉片西蘭花我想食之時已俾人食哂﹗
椒鹽軟殼蟹，對上一次來食過之後念念不忘﹗
超大碟數下數下有成五六隻蟹仔，炸得鬆化脆口，熱辣辣半隻放入口慢慢咀嚼是人生一大享受﹗
三色蒸水蛋，用料夠多又滑溜，我只食了一羹不過竟然成隻蛋王0係入面﹗
雙雞粥意即田雞與滑雞粥，粥底算綿不過未算入味，似雞還雞粥還粥﹗
粟米斑塊，放得離我太遠，夾不到已給工友們食哂﹗
生炒骨入口香脆，酸甜度適中，別人說要吃一間小炒店的水準應從生炒骨著手，我絕對不明白灣仔生記點解會有人話佢好食﹗金利來的比他更佳﹗
乳鴿幾肥大，皮脆肉嫩，工友們搶住咁食﹗
呢個成隻鮑魚咁既
豬大腸我就無食喇﹗
0的肥膏勁過出來食的好多倍，好此道者應該滿足﹗
難得聚頭當然要碰碰杯啦﹗飲勝﹗
呢個餸唔記得叫什麼，用料相當豐富，大量蝦、魷魚及蟹柳等，再加上白白滑滑的蛋白，底層鋪滿西蘭花，又肉又菜用來送飯一真係一碟頂幾碗都得﹗
最後有工友未飽再叫多個
鴛鴦炒飯作結﹗
整體來說味道很不錯，食左成二十個餸再十幾支啤酒一人都係$100就埋到單，真係抵到爛﹗
牛頭角下村的大排檔三月尾便要搬遷，相信搬了以後亦未必可再尋回現在的風味與光輝，要吃便要快了﹗
