丹尼爾石仔搞gag當紅 評述奧運變棟篤笑

【明報專訊】網民開fans club 人數一周達2500
奧運
期間，場上健兒來自世界各地，錄影廠內的主持人、評述員亦來自五湖四海，當中有人被狠批奧運知識貧乏兼曬命，然後回應「叫網民返屋企啦」；亦有人早在三四年前已開始準備，結果以專業的表現及對體育的認識贏得網民好評。
明珠台
的粵語評述陳恩能和石金華，既無港姐的美貌，亦自認沒有徐嘉樂專業。但有網民率先在blog內細心記錄二人200條搞笑金句；有人於facebook成立他們的fans club，一周內人數突破2500，在網民當道的新世代中，他們紅了。
堅稱事前無度gag 臨時自由發揮
陳恩能（丹尼爾）和石金華（石仔）堅稱，事前沒有度過任何gag﹕「就係因為冇度過，所以估唔到有咁好反應。明珠台都唔知我哋係咁嘅人。」以往石仔講波都是一本正經，今次改變路線，他說原因是「乜都冇」﹕「今次奧運大部分資源去咗翡翠台和北京
，明珠台完全無定路線，有聲就算。不過有聲都要有嘢講。第一日直播，連出場名單都冇！」資源不足反而讓二人自由發揮﹕「喺明珠台冇得出鏡，會free啲，可以亂來。」
直播時笑到「捐」入枱底 熄咪10秒
奧運期間，石仔每日評述13小時，丹尼爾則上午返工，下午和晚上評述9小時，有時加上翁金驊及黃興桂。要他們數評述過什麼冷門項目，他們數了一輪手指﹕「係得乒乓未講過……」讀着40多頁的金句讀得出神，兩人說﹕「自己睇返4、5次都覺得好好笑。」二人在直播室，一樣日日都笑到人仰馬翻。石仔說﹕「我通常笑到『捐』入枱底，佢就比較忍得，深呼吸定一定神就再講過。有時一個頂住，另一個出去笑住先。」丹尼爾補充﹕「如果真係唔掂，就會熄咗支咪大笑10秒先至開返咪。」
難忘亂評激流獨木舟 扯到雙城記
石仔憶述最難忘的大笑經驗﹕「有一次直播激流獨木舟，個畫面係直升機喺上空影住個水上公園成5分鐘，於是我哋就亂講，由水流方向講到世界上仲有無呢類水上公園，再講布達佩斯其實係兩個城市，講到去分開布達同佩斯條河係萊茵河，最後講到雙城記。點知第二日突然捉咗我去高清
台評述，當時桂神（黃興桂）已經坐喺度。我一坐低佢遞張紙埋嚟，上面寫住布達佩斯條河係多瑙河，我哋即刻笑到出唔到聲，我趕咗桂神出去，因為我見到佢笑我都收唔到聲，結果佢笑咗5分鐘先返入嚟。」丹尼爾插嘴﹕「桂神啲笑聲唔係哈哈大笑，係『kit kit』聲，我哋好多時笑都係因為佢嘅笑聲。」如此過癮的節目風格，監製可有異議？「唔會，因為監製自己都笑緊。」
丹尼爾否認自己騎呢﹕「因為我唔想做騎呢怪。但我平時都鍾意搞gag，即係有乜嘢都會兜個圈講。但我唔鍾意『搞爛gag』呢個term囉，咩叫爛gag先？」石仔開始為自己的gag辯護﹕「好似呢句拿度食緊大蕉，我講埋大蕉有一個重要功用係通便。我識一個長者一日唔食大蕉就去唔到（廁所），呢個係中國人的常識！」
作為年輕人，丹尼爾當然知道自己的gag受歡迎，但他說﹕「我依然係評述第一，搞gag第二，唔會過火。做評述最緊要知道自己定位。徐嘉樂係香港籃球隊和排球隊代表，我哋永遠做唔到徐嘉樂。但係我哋可以以體育迷的身分，陪大家一齊睇比賽。奧運同足球唔同，大部分觀眾對好多賽事都唔太認識，我哋運用本身的體育觸覺，以輕鬆手法帶大家一齊睇。」
誰說他們不專業？石仔有多年執教足球隊經驗，採訪過多屆奧運及亞運，丹尼爾自2000年起主持體育節目，曾評述足球、冰球、單車、賽車等比賽。雖然今次奧運有不少冷門賽事，但累積下來的體育觸覺大派用場﹕「比賽前我哋會做功課，了解賽事規則同選手背景。講技術分析就好難扮專家，但起碼知道擲鐵餅講離心力，射擊睇選手的精神面貌。」
「只顧搞笑無體育知識就唔好」
丹尼爾還是說﹕「大家喜歡我哋搞gag當然開心，但如果大家覺得我哋評述得好就仲好開心，我唔係出嚟搞gag嘛。」
上星期六明珠台直播金牌選手來港獻技，孖寶因此重組，他們都認為跟自己受歡迎有關﹕「有時本來7點收工，要我OT到11點，我估收視應該有上升。」問他們是否認為對方是最佳拍檔？ 二人相視而笑，石仔先開腔﹕「我希望將來係！」丹尼爾立即接話﹕「今次真係啱啱遇着剛剛，一個鍾意搞gag另外一個又接到。我希望將來可以繼續合作！」
明報記者 何雪瑩