死人化妝師的入行條件及需知
要入殯儀呢行唔難，但呢行強調既，並唔係你有冇膽或驚唔驚。的的確確，死人化妝呢行薪金非常可觀，正如一個"學師仔"，佢既起薪點亦已經有$23000。呢行亦無年齡、性別、經驗限制。係咪好吸引就見人見智吧。
不過你係需要具備特別條件至能夠勝任。而所為條件即係你本身五行各方面夠唔夠正氣同殺氣。至於師傅樣點至知你有冇條件？師傅係有種另類應徵方法。各位有意應徵的話請考慮清楚。
首先師傅會安排你響一個停屍間，而停屍間裡當然會有具屍體等緊你，停屍間內好細,房內祇有你、先人、一盞油燈、一張椅子和一部冷氣。
師傅會安排三日俾你，呢三日你祗需坐響呢間房，坐既時間係每日由黃昏約6:30至凌晨12:30不等。響停屍間，你基本上係乜野都唔需要做，師傅純粹要你齋坐響度對住條咸魚幾個鍾頭，其間師傅祇會間中入黎望下你，你唔好期望師傅會企響度同閒談，因為師傅藉此驗你定力同忍耐力(當然期間你可以去食飯去洗手間)就係咁，你要連續齋坐三日。
至於師傅是否錄用你就好睇你往後個星期，至於點解？原因係大部份人坐完三日後個七日都會有不同既反應，而呢七日期間師傅會跟你通電觀察你情況。
何謂反應？何謂觀察？因為大部份人都會出現無故嘔吐、發燒、有惡 夢、暈眩或大病等等無法解釋既症狀。故此，師傅都定必需要知道你過後反應，師傅以此作為你是否具備錄用條件。當你坐三日後有以上任何一種反應，均表示你陽氣不足、正氣少、殺氣低，受唔起陰氣及靈氣磁場。即使你再有膽大包天都係徒然。因為過後反應正正代表你生辰八字、五行唔能夠承受過多陰氣及靈氣磁場，故此跟睇相並無關係。若果坐三日都依然食得、訓得、冇唔妥，則恭喜你，殯儀行業等緊你！
當你正式被師傅收為徒後，基本上並無特別儀式或要求，衹需謹記師傅所提及既行規及禁忌便可。而由學徒做起到升任至資深化妝；為期至少需三至五年不等。
起初師傅會將一般由醫院病逝而又完整無缺之屍體，響你面前打理一番，期間，師傅會邊做邊講解之餘亦會同先人傾偈，起初你係行行企企、執下手尾、睇師傅台戲、記化妝品用途種類、次序。通常師傅俾你睇得有七、八件咸魚後，大約第十件至會俾你掂佢。然而，你起初既對象都係企企理理，冇穿冇爛(即醫院病死者)較為Easy-Job。而其他大制作則會由師傅表演。(大制作即指死於跳海、跳樓、火燒、甩皮甩骨等)
有新人(死者)到首先要打針(防腐劑)，然後入櫃( 雪櫃)。
通常先人會於起程(出殯)前兩日移至另一凍的房解凍。要同佢地沖涼、化妝、穿壽衣，最重要一環係按家屬意思去辦。沖涼後，裝身，先將大量浸滿漂白水之綿球，搗塞於人體每一個有孔位置(作用以防血水倒流。
穿壽衣，必需要由腳開始著上去，即襪、鞋、褲/裙、上衣，如此類推。 先人壽衣由下而上穿上乃取其寓意先人會升上天免落地獄。
先人化妝品、用品、配件...通通定必為頂級品牌！例如，"Maxfactor"，"露華濃"，"資生堂"，"SK-II"，"Chanel"等等。用靚野原因係基於特別上妝持久、減低屍班色，亦作為對死者一種尊重吧。
