餐廳名: 雲貴川風味
地址:荃灣四陂坊14號地下
整體評分:3.6
每人價錢:儉 ($40或以下)
食評(包括食左d咩):
早一排打完波就同幾位好友出左去食晏, 一行三人, 是次都係由徐兄帶路, 揀左呢間食店, 佢好坦白話呢間食店唔係話得好味, 不過都可以一試!
行到埋去人山人海, 大排長龍, 唔信? 有相為正架, 張相正正係由師傅個位映埋去門口架! 未坐底先柯打野食, 呢一招師傅都好耐試過喇, 最後諗左一陣就柯打左炸醬同豬腸, 配上中辣! 等左都幾個字先可以入到去坐, 坐底都幾鬼死逼, 不過一坐底就有得食, 真係"快"!
第一時間先試下個湯底, 湯底夠麻夠辣, 中辣真係有d料到; 炸醬嘅肉碎份量都幾多, 味道都唔錯, 幾好; 而豬腸都夠腍夠肥, 口感一流, 都算幾好味; 而師傅亦有幸從除兄碗中試過腩肉同豬肚, 而腩肉都算爽口, 口感頗好, 幾好; 而豬肚亦不過不失, 唔錯喎; 而米線就煮得腍左少少, 麻麻地啦!
總括黎講米線質素唔算太出色, 環境非常擠逼, 服務麻麻, 價錢又唔算平, 廿七蚊兩個餸未算抵食; 師傅唔知係咪呢區比較少米線食店, 所以呢度至會大排長龍, 不過長龍又不等如出色, 如果再揀師傅都唔會再黎, 笑臉亦比唔到!
http://foodpara.com/blog/?pgtype ... u1214&did=64525
