我第一次寫戰報，請多指教！
我剛下載了１８０城版本，於是就試下揀個最少手下既黎用，
希望呢次可以拖長玩到１６ＸＸ年吧～
之前冇留意原來已有人寫左蠣崎家，不過唔緊要啦～
諗唔到用乜戰報名，就求其叫住做「逆水松」先喇！
開波～



＃２　　－＃５　　　～序章～
＃１１　　　　　　　～序章．續～　
＃１２　－＃１４　　～第一章～　～出海～
＃３２　　　　　　　～第一章．續～
＃４０　　　　　　　～第二章～　～遠征～
＃４６　－＃４８　　～第二章．續～
＃５３　－＃５４　　～第二章．再續～
＃６６　－＃６７　　～第三章～　～抽水～
＃８３　－＃８４　　～第三章．續～
＃９３　－＃９４　　～第四章～　～山中～
＃９８　－＃９９　　～第四章．續～
＃１０８－＃１０９　～第四章．再續～
＃１２１　　　　　　～第五章～　～佛敵～
＃１２３－＃１２７　～第五章．續～　
＃１３６－＃１３９　～第五章．再續～
＃１４０　　　　　　附錄：南條家滅佛路線圖
＃１５５－＃１５７　～第六章～　～遺志～
＃１６３　　　　　　～第六章．續～
＃１７０－＃１７１　～第七章～　～南侵～
＃１７２　　　　　　附錄：南條家征九路線圖
＃２０１－＃２０２　～第八章～　～對決～
＃２２０　　　　　　～第八章．續～
＃２４９－＃２５１　～第八章．再續～
＃２６３－＃２６５　～第九章～　～包圍～
＃２７２－＃２７４　～第九章．續～
＃２９０－＃２９３　～第九章．再續～

～序章～
蠣崎季廣，４９歲，蠣崎家第四代當家，德山館老闆。
南條廣繼，２８歲，季廣手下，德山館唯一員工。

１５５５年５月
季廣：　喂～　廣繼！　好悶呀，搵Ｄ野搞下丫～
廣繼：　你．想．點．丫～
季廣：　我突然間想．．．稱霸．．．天下呀！
廣繼：　認真的嗎？
季廣：　ＳＵＲＥ！　我想起呢個島仔召集人馬，你會幫我架可？
廣繼：　咁就要睇下有咩ＪＡＣＫＳＯ喇．．．
季廣：　你想要乜我都可以俾到你，你即管開聲！
廣繼：　人不外乎要錢要女人既姐～　你知我想點既～
季廣：　得得得！　你有表現既我實重重有賞！　咁我等你既好消息啦！！
廣繼：　遵命！

１５５６年１月
季廣：　喂～　廣繼！
廣繼：　咩事呀老細．．．
季廣：　我叫你搞果Ｄ野搞成點呀？　成年咁耐我都見唔到一個似樣Ｄ既人喎！
廣繼：　唉．．．　呢度全部都係Ｄ農夫，字都唔識多個，募到幾千兵仔都算勁喇嘛！　唔係咁都唔滿意呀嘛！
季廣：　咁冇大將點出去打天下呀？
廣繼：　我帶兵出去打咪得囉！　你俾一萬兵我，我先佈防起箱館港，等待時機，有機會就出擊囉！
季廣：　好啦！　就咁決定！　另外薪金果度加左俾你架喇，你返去打簿ＣＨＥＣＫ下喇。
廣繼：　謝主隆恩！　咁我返去做野先喇。
呢個時候起廣繼身後有個少女突然出現：
廣繼：　哇～
季廣：　呀～　未同你介紹～　呢個係我大女，叫阿圭，叫聲廣繼哥哥丫～
圭　：　ＨＩ～　廣繼哥哥係好～
廣繼：　呃．．．　呀．．．　你好，乜原來你有個咁大個既女架哪？
季廣：　係呀，係唔係好靚先！
廣繼：　靚．　靚．　靚．．．　唔阻你地，我走先哪。

１５５６年４月
季廣終於發現有Ｄ唔妥，心諗：　
自己主場德山館得果三四千人，廣繼果度箱館港有成萬幾人，佢反一反我咪大檸樂？
又正起呢個時候佢個女行過，心生一計：　將個女嫁畀佢，做左女婿，大家一家人，一定唔會反我喇！　ＹＥＡＨ～　就咁決定。
於是翌日就召見廣繼：
季廣：　我地大家都咁熟，情如父子，不如親上加親，我將我大女許配畀你，如何？
廣繼：　小人當然不會推遲！　阿圭佢美若天仙，娶到佢小人幾生修到啦！　外父大人！
季廣：　好！　好！　今日我好高興！！　嘿嘿嘿～

１５５６年５月
有一日季廣出去打獵，竟然發現到一座金山。
季廣：　哇～　發達哪！　今勻真係打跛腳都唔駛憂哪！

第二日季廣召開全體人大會議：
季廣：　我琴日發現左一座金山，相信大家都知道架喇，我琴晚都諗左好耐，既然家陣發左達，我想退休休息下，去環遊世界，起呢幾個月我會全力去開採呢座金山，咁呢頭家Ｄ野我唔會有時間理住架喇，我決定讓位俾南條廣繼，由佢領導大家喇下。
廣繼：　你之前話想稱霸天下，咁．．．
季廣：　我講少之嘛咪鬼當真喇～　正所謂「人生五十年，變幻無常。」　我宜家都五十歲啦～　又發左咯，唔玩仲等幾時丫～
廣繼：　外父大人你．．．　唉～　算啦，你要我做當家我冇問題既．．．
季廣：　由今日開始你就係蠣崎家第五代當家！　哈哈哈哈哈～
廣繼心諗：　仲乜鬼野變左我好似入贅咁架　：＜



＊今日寫到呢度，明晚繼續，有仗打架喇．．．

第一～～  支持支持～～

好生鬼～

速滅南部.....  
「乜原來你有個咁大個既女架哪？」令我諗左第二樣野

支持支持~~~

p.s. 交涉容易成功...

支持支持!!
快出快出

支持支持
但相信武田一樣好快稱霸

多謝大家支持！！

～序章．續～

話說蠣崎季廣去左掘金，交低左頭家俾南條廣繼。

廣繼多年親近季廣，已經手握重兵，家陣連龍頭棍都渣埋，處心積累經營終於得到回報，之但係人既野心係無窮無盡既．．．

１５５６年１２月２日
季廣掛住掘金已經連續六個月都冇返過屋企，今日就接到一封飛鴿傳書，裡面寫到：

親愛的外父大人：
　請你立即趕回來！　阿圭佢病左，初時似為普通感冒，但係唔知點解幾日都未退燒，
佢已經昏迷左好幾日，我請左十幾個大夫黎睇，都對佢呢個病束手無策！　
我驚佢唔知會唔會有Ｄ乜野不測，你快Ｄ返黎睇下佢喇！
　　　　　　　　　　　　　　　　　　　　子　廣繼

季廣心急如焚，連日快馬日夜兼程，三日後終於返到．．．
兵仔：　蠣崎大人！
季廣：　我個女點樣呀！？　帶我去見佢！　廣繼佢宜家起邊呀！
兵仔：　南條大人已經起內堂等你，呢邊請．．．
季廣入到內堂，只見到廣繼一個人起度，季廣正想說話既時候，突然間被人從身後推倒，回頭望下咩事啦，就發現有四名彪形大漢，還來不及反應，就被其中一條友箍住，無法動彈．．．
季廣：　發生咩事！　你地做乜野！！
廣繼：　唔好對外父大人咁粗魯。
季廣：　廣繼！　究竟發生咩事呀！？
廣繼：　外父大人唔係咁都唔明呀嘛？　我做到咁你都唔知我想做乜？　好明顯想埋你單喇！
季廣：　廣繼！　你！　作反呀你！
廣繼：　ＮＯＮＯＮＯＮＯＮＯ～　外父大人唔好咁講～　我宜家雖然統領左成個蝦夷，但係人民始終都係只係記住蠣崎。　我始終都唔係留住蠣崎家既血，有人會唔服我！　而且日後當你個仔元服之後，我相信你會將我拉返落黎，我等左咁耐就係等坐呢個位，我唔甘心將來又要交番哂出黎！！　仲有你留低個家又留低錢，班工人呀士兵呀已經冇糧出兩個月，唔垃埋你座金山我地點生存呀！
季廣：　你呢個大逆不道！　我ＸＸＸＸ呀！！！　狗賊！！
廣繼：　講多無謂，我尊重你係一個武士，就賜你切腹自盡吧啦～
季廣：　可惡！　就算我死左！　呢個仇我唔會唔記得既！！
廣繼：　呀！　係喎～　我都未話你聽，你個大女阿圭佢真係病左，不過係上個月既事，不過唔知叫好彩定唔好彩，病到痴痴呆呆咁，失左憶，佢已經唔記得自己老豆係邊個！
季廣：　你好野！！　你贏哂啦！　我認命！　係宜家我只係想你放過我家人！
廣繼：　你個仔．．．得幾歲仲細，跟本就乜都唔知，我會慢慢「灌輸」佢忘記你呢個老豆架哪～　我認承你，只要佢地乖乖地，我就唔會殺佢地，你安心去啦！
季廣：　好！　佢地有乜事我做鬼都唔會放過你！　來吧！！

蠣崎季廣結束了波瀾壯闊五十年人生．．．

廣繼：　哇哈哈哈嘿嘿～　我就係南條家第一代當家！！　從今日起！　天下布武！！

～第二章～　～出海～
發生左呢單野之後，南條廣繼聲明狼藉，成年都請唔到人，唯有自己一個人去掘金，係就係辛苦Ｄ，鬼叫請唔到人丫．．．　如是者過左兩年．．．

其間廣繼兩個私生女慘被獸父拉出去做童工．．．

１５５９年３月
有三千名市民遊行示威，演變成沖突，最後武力平息暴亂，千多人死亡。　南部家既統帥南部晴政已發表言論承認責任。　廣繼於是開始著手將目標移向南部家。

起出兵之前先要做足準備，先向盟友安東愛季取得有關水軍既技術，再交保護費俾佢旗下既海盜團保障水路安全，剩係呢Ｄ都搞左成兩年．．．