有xbox360既人一定有聽過Halo，雖然Halo明顯唔合香港人既胃口，但佢係全世界的確非常受歡迎。呢隻Halo Wars 絕非副產品咁簡單，原因係佢交由即時戰略遊戲老大 -- Ensemble Studio親手打造，有玩過AoE系列或RoN的話相信已明白佢地既實力。
本次Demo 共1.52 GB，包含兩個教學關卡，兩個故事任務及一個地圖戰(一個地圖對AI)。
畫面：
整體畫面十分好，佢並非驚為天人，但以即時戰略遊戲有如此效果已另人十分滿意。故事關卡中有唔少中規模戰鬥但唔會lag機。有玩過Halo既人相信已估到有唔少爆炸效果，而Halo Wars呢方面亦做得出色，唯一要彈就係殘骸處理得比較馬虎，殘骸落地半秒就會半透明消失，未能滿足愛破壞既玩家，但要維持一定既FPS數，呢方面可理解。如果大家鐘意Halo既美術風格、人設等，呢隻絕對唔會另你失望，色彩鮮豔既畫面配合激烈既爆炸效果，畫面絕對可上8分位。
操作：
十個有九個玩家第一句肯定問用手制玩即時戰略會唔會好笨拙。正如我地第一次用手制玩射擊game一樣，當你玩過Halo Wars之後就會發覺手制係打機方面真係萬能。
選取單位(unit)上無難度，主要係畫面zoom得大，類似WarCraft，並非AoE果d兵仔好似黑頭咁細，所以盲毛都唔會點錯兵。另外當你選取一大群單位，當中有幾隻款，你可以用RT再獨立挑佢出黎落指令，相當方便。攻擊只要對位目標按X就得，但好多兵有兩種攻擊，次攻擊就按Y。
當然，要玩得高級d要做微調，比如步兵就正常攻擊，但你可以挑疣豬號出黎按Y鍵做衝撞，車死敵方d精英。衝撞只要指住敵人按一下Y鍵ok，唔洗慢慢click。 操作上唯一要彈就係地圖轉換問題，傳統既電腦戰略game 你可以click細地圖做快速移動，但Halo Wars就無，雖然你可以用 D-pad(十字鍵)set 主要視點位，以後一按就會飛去果度，但始終唔夠方便。
(↑已證實用LT可以快速移動鏡頭。)
整體來說，Halo Wars既操作相當順手。
玩法：
Halo Wars只有兩個種族：人類及星盟。遊戲節奏相當快，如果同人一打一，你絕對可以三分鐘內比人打殘。因為Halo Wars主要玩兵，而非傳統AoE既資源。Halo Wars既資源只有一種，而且無限量供應，一開始你要立即要諗出乜兵，點配合。
Halo Wars既基地只可以建於指定地方，如同AoM一樣。基地有如一個九宮格，你要起其他野必須於九宮格內。而生產資源既建築亦要係九宮格內起，即係話，你要資源有幾多，好睇你九宮格內既分配。當用完九宮格，你要再多d位，必須爭奪其他建基點。Halo Wars無論出兵定起野速度都十分快，六秒一隊兵，十秒一座樓，快過搭飛機，亦另遊戲節奏提升不少。
整個Halo Wars玩法就係：對內，你要分配好九宮格內建築物比例(幾多個兵工廠，幾多個資源生產建築..)，對外你要出乜兵配合，對戰時要做適當既微調。我信相資源分配如正AoE一樣過得耐會有公式，至勝關鍵在於你如何用兵。
Halo Wars係一隻簡單直接又易玩既即時戰略，擁有漂亮既畫面，快速既節奏。單人故事戰役精采，過場以非常高水平既CG交待劇情，多人亦相信會打得好激，大家唔好錯過。
(驚，隻game既demo居然係簡體字+普通話...希望正式版係英語音+繁中字)
